³⁶ ئغرا يان ؤفرّيسي ئي سيدنا عيسى حما أد غورس ئتّش. داي يدّو سيدنا عيسى يكشم غر ثادّارث ن - ؤفرّيسّي يسنّد غر ثاما لميدا.³⁷ ثيلي ݣ - ثمدينث نّا يوث ن - ثمطّوطّ ئفسدن. لّيݣ ثسّن ئيس ئلّا سيدنا عيسى ݣ - ثادّارث ن - ؤفرّيسي، داي ثدّود، ثاويدّ يوث ن - ثالبوشت ن - زّهر نّا يغلان،³⁸ أها ثوث خف ئفادّن نّس فّير ن ـ سيدنا عيسى ثقّيماس غر ئضارّ أر تّرو، ثسفالّ أراس ثسّبزوي يضارّ س - ئمطّاون نّس، أراسثن ثن ثسّفض س - ؤشكوك نّس، أراس ثسّودوم ئضارّ أراسن تّامس زّهر.³⁹ لّيݣ يانّاي ؤفرّيسي نّاس ئغران أينّا، ئسيول ئنݣراس د - ئخف نّس أها ينّا: «مور ئݣي ؤرݣاز أد نّبي أها سثيتّ يوزنثيد ربّي، أليݣ ئسّن مايد ثمس ثمطّوط أد نّا دا غورس ئطّاژضن د - ميمش أيد ثݣّا ثودرث نّس، ئدّخ ثݣا ثامطّوط ئفسدن!»⁴⁰ ئسيول سيدنا عيسى ينّاياس: «أسيمعان، ريخ أداش ئنيخ شا». ئنّاياس سيمعان: «واخّا أياسّلماد، ئني أينّا ثريد».
⁴¹ داي ينّاياس: «ئلّا يان ؤرݣاز ئرضلن لفلوس ئي سين ن - ميدّن. ئرضل ئي يوكّ خمسيّا ن ـ ؤقّاريض ن ـ نّقّرث، ئرضل ئي وايّاض خمسالاف.⁴² نتّا ؤر غورسن ئلّي ماس أس تّراران أمرواس، داي يسامحاسن سّين نسن. ئوا يينيي، مان ديكسن أيد ئدّان أث ييرين ؤݣار؟».
⁴³ ئرارغيفس سيمعان ئنّاياس: «عينخ ؤنّا مي يسامح ݣ - شايݣان ن ـ لفلوس». داي ينّاياس سيدنا عيسى: «سثيتّ أي ثنّيد».⁴⁴ ئبرّم غر ثمطّوطّ أها ينّاياس ئي سيمعان أفرّيسي: «راعا ݣ ـ ثمطّوط أد، لّيݣ دّكشمخ غر ثادّارث نّش ؤر ئي ثوشيد أود أمان أد سّيردخ ئضارّ ئنو زݣ ؤݣضرور، ئيد ثامطّوط أد هاثين ثسّيرديثن س - ئمطّاون نّس، أها ثسفضيثن س - ؤشكوك نّس.⁴⁵ أود أسلّم ؤر غيفي ثسلّيمد، ئيد نتّاث زݣّوس دّكشّمخ ؤر ثرصّا زݣ ؤسّودم ن - ئضارّ ئنو.⁴⁶ شݣّين ؤر ثوميسد أود شان زّيث ئي وقرّو نو، ئيد نتّاث ثومس زّهر ئي يضارّ ئنو.⁴⁷ خف ؤياد أداش ئنيخ: هاثين تّوغفرنثاس لمعصيّاث نّس نّا عدّانين، أينّا خف مي يي ثسنعث أنشثيد ن ـ ثايري؛ ماشان ؤنّا مي يتّوغفر شا يدروسن، دا يسنعاث غاس شوي ن ـ ثايري».⁴⁸ داي ينّاياس ئي ثمطّوطّ: «هاثين تّوغفرنثام لمعصيّاث نّم».⁴⁹ قّيمين وينّا لّانين أݣيدس غر لميدا أر تّينين ݣ - ئخفاون نسن: «مايد ئغال واد ݣ ـ ئخف نّس ألّيݣ دا يتّغفار ئي ميدّن لمعصياث نسن؟»⁵⁰ أها ينّاياس ئي ثمطّوطّ: «هان ليمان نّم ئفوكّاشم، مون د - لمان!»
© 2024 Bible Society of Morocco, used with permission