¹ يان واسّ، ئقّيما سيدنا عيسى أر ئتژالّا ݣ - شان وانسا. نتّا يشمّل، ئنّاياس يوكّ زݣ ئمحضرّ نّس: «أمولانا، سّلمداخ أنژّال ئمشينّا ئسّلمد سيدنا يحيى ئي يمحضرّ نّس».² داي ينّاياسن: «أدّاي دا تّژالّام أها ثينيم: "أيبّاثنخ نّا يلّان ݣ ـ ئݣنوان، أد ئتّوسّمغور ييسم نّش، ثدّود ثݣلديتّ نّش.³ أكّاياخ كوياسّ أغروم نّاخ ئتقدّان.⁴ ثسامحداخ ݣ ـ لمعصيّاث نّخ، ئدّخ دا نتّساماح أود نوكّني ئي وينّا دا غيفنخ تّعدّانين كول، ثحضوضاخ زݣ شّيطان أد ؤر أخ ئتجرّاب"».
⁵ داي ينّاياسن ديخ ألثو: «مش ئلّا غر شا ديݣون شان ؤمدّاكّول أها يدّود غورس ݣ - وامّاس ن - ييض يينيياس: "أيا مدّاكوُل ئنو، رضلي شراطّ ن - ثوغريفين،⁶ ئدّخ غوري ديدّا يان ؤمدّاكل ئنو زݣ تّيساع أها ؤر غوري يلّي مايداس أكّاخ".⁷ ئيد أد غيفس دّيرار زݣ جاج ن - ثادّارث أها يينيياس: "أد ؤر ئي سطّورّوي! هاثين قّنخ ياد لباب، ئݣا لحال ݣّيض، ئليخ نكّ د - واراو ئنو ݣ - ثيسّي، ؤر غيخ أنّ كّرخ أداش ؤشخ أينّايي ثتّرد"».
⁸ «أداون ئنيخ: "مغار ؤر ئكّير أداس ئوش ئدّخ ئݣا أمدّاكّل نّس، هاثين ئدّا أد ئكّر أداس ئوش أينّا يرا ئدّخ ئيث ئسطّورّي س ـ ثيثي ن ـ لباب".⁹ د ـ نكّين داون تّينيخ: "تّراث أها يتّمّوشاون، رزوياث أها ثافيم، ؤثاث لباب أها يتّورژماون.¹⁰ ئدّخ كول ؤنّا يتّرن ئدّا أد يامژ، د - ونّا يرزان ئدّا أد ياف، د - ونّا ينقّرن لباب ئدّا أداس ئتّورژم.¹¹ ئي كونّي ألوالدين، ؤنّامي ئتّر ديݣون ممّيس أسلم، ئيد أداس يوش ثيفيغرا ݣ - وانسا ن - ؤسلم؟¹² ئي مش أس ئتّر ثاݣلايث، ئيد أداس ئوش ثيغيرضمث؟¹³ داي مش ثسّنم كونّي نّا يخّان أتّوشيم ئي واراو نّون أينّا يژيلن، ئوا مشثا أيدا ياكّا بّاثون نّا يلّان ݣ - ييݣنّا رّوح نّس ئصفان ئي وينّا داسث تتّرنين؟"».
(ماتّى 12:22-30؛ مارقوس 3:20-27)
© 2024 Bible Society of Morocco, used with permission