¹ يان واسّ ئلّا سيدنا عيسى ئبدّا ثاما ن - ؤݣلمام نّا مي دا تّينين جانّيسارث، أر غيفس تّمثحاين ميدّن حما أد سّغدن ئي واوال ن - ربّي.² شوي يانّاي سناث ن - ثغرّوبا بدّانث ݣ - ئميسّي ن - ؤݣلمام، فّغند زّيكسنث ئصيّاضن حما أد سّيردن ثيراتسّيوين نسن.³ داي يني سيدنا عيسى ݣ ـ يوث زّيݣسن، ݣ ـ ثنّا يݣان ثين سيمعان، ئتّر زّيكس أتّيسوشّم شوي غر جاج ن - وامان. ئقّيم أرد ئساوال ئي ميدّن زݣ جاج ن ـ ثغرّابوت.
⁴ نتّا يشمّل أوال نّس، ئنّاياس ئي سيمعان: «كشم غر أدغار نّا يغبان، ثݣريم ثيراتسّيوين نّون أد ثصّيّضم».⁵ داي ينّاياس سيمعان: «أسيدي، هاثين نوحل ألّ يوفو نتصيّاض، أها ؤر نوميژ شا، ماشان دغي ݣ ـ ئي تنّيد، دّيخ أد ݣرخ ثيراتسّيوين».
⁶ ݣين أينّاسن ئنّا سيدنا عيسى أها أمژن شيݣّان ن - ئسلمان ألّيݣ رانث ثراتّسيوين نسن أد بينث.⁷ شيّرن ئي يسمونّ نسن نّا نّلّانين ݣ - ثغرّابوت ياضن حما أد دّون أداسن عاونن. داي دّوند أها عمّرن ثيغرّوبا سّناث ألّيݣ رانث أد غلينث.⁸ نتّا يانّاي سيمعان بطرس أينّا، داي يبندق داث ن - سيدنا عيسى أها ينّاياس: «دّو زّيݣي أمولانا! هاثين ݣيخ أرݣاز ئعصان ربّي».⁹ داي يهبض نتّا د - ئسمونّ نّس كول ئدّخ ؤمژن شايݣان ن - ئسلمان.¹⁰ أود يعقوب د - يوحنّا أراو ن - زابادي نّا أمّونين د - سيمعان ݣ ـ ؤغرّابو هبضن، داي ينّاياس سيدنا عيسى ئي سيمعان: «غاس أد ؤر تݣّد، زݣ واسّا ثدّيد أد تصيّادّ ميدّن».
¹¹ نتّا حريندّ ثيغرّوبا سّناث غر ثاغارث، زرين كولشي أها ثفارن سيدنا عيسى.
(ماتّى 8:1-4؛ مارقوس 1:40-45)
© 2024 Bible Society of Morocco, used with permission