¹ «نكّ دّيليت تارصليت أها ئݣ ئبّا أفلّاح ن دّيليت.² دا ئتكّس تيسطوين نّا ديݣي ئلّان أها ؤر دا تݣين لغلت، أر-ئتژبار أها أر ئسزديݣ تيس ئتݣّين لغلت باش أد ݣين ؤݣار.³ كونّي، تزدّيݣم ياد س واوال نّاون نّيخ.⁴ أمژات ديݣي، د نكّين دّيخ أد-أمژخ ديݣون. تاسطّا ؤر تّيغي أد تݣ لغلت زݣ ئخف نّس، مش ؤر توميژ ݣ دّيليت، هات مش ؤر توميژم ديݣي أود كونّي ؤر تّيغيم أت تݣيم لغلت.⁵ نكّ دّيليت د كونّي تݣام تيسطوين: ونّا ديݣي يومژن أها أمژخ ديكس واد أد ئݣ شايݣان ن لغلّات، ئدّخ بلا نكّين ؤر تّيغييم أت تݣيم والو.⁶ ئد ونّا ؤر يوميژن ديݣي ئدّا أد ئتّوݣر غر برّا أم تسطّا أها ئقّار. د تسطوين نّا ئقّورن، تّوسمون، تّوݣرن ݣ لعافيت أها أر تغوسن.⁷ ماشان مش ديݣي تومژم أها يامژ واوال ئنو ديݣون، تّرات أينّا ترام أها ئتّموْشاون.⁸ مش تݣام شيݣان ن لغلّات أها س-ؤياد دا تسباينم ئس تݣام ئمحضرن ئنو، ئدّا أد ئضهير لعزّ ن ئبّا.⁹ نكّ دا كون تّيريخ ئمشينّا دا ئ ئتّيري ئبّا. ئوا أمژات ݣ تايري نو.¹⁰ هات مش دا تضاعم لوصييات ئنو، تدّام أت تامژم ݣ تايري نو، ئمشينّا ضاعخ لوصييات ن-ئبّا أها أر تّامژخ ݣ تايري نّس.
¹¹ نيخ-اون أياد حما أد ييلي ؤفراح ئنو ديݣون، أها ؤر ئتخصّا والو ئ وفراح نّون.
¹² هان تاد أيد ئݣان لوصييت ئنو: ئخصّا أت تمييريم ئنݣراون، أكيس كون تّيريخ.¹³ ؤر تلّي شا ن تايري يوݣرن تاد، أدّاي ئوش يون تودرت نّس خف ئمدّوكال نّس.¹⁴ ئمدّوكال ئنو أيد تݣام، مش دا تضاعم أينّا س كون توصّاخ.¹⁵ هاتين ؤسار-أون غريخ ئسمغان ئنو، ئدّخ ئسمغ ؤر دا ئتّيسين مايد ئتݣّ باب نّس، ماشان أداون غرخ ئمدّوكال ئنو، ئدّخ أون نّيخ كول أينّا مي سلّيخ زݣ ئبّا.¹⁶ ؤر-ئد كونّي أيدي ئستين، ماشان نكّ أيكون ئستين، كلّفخكون حما أت تدّوم أها تݣيم لغلت، لغلت نّا ئتغيمان أبدا. داي ئدّا ئبّا أداون ئوش كول أينّا تدّام أداس تتّرم س-ئسم ئنو.¹⁷ ئوا هان أينّا خف كون توصّاخ: أت تمييريم ئنݣراون».
© 2024 Bible Society of Morocco, used with permission