¹ دغي ؤر ئقّيمي أود يون لحكام خف وينّا ݣانين وين عيسى لمسيح.² ئتّخ جّهد ن رّوح نّا ياكّان تودرت س عيسى لمسيح، ئفوكايي زݣ جّهد ن دّنب د لموت.³ أينا مي ؤر ئيغي شّرع ن موسى أتّيݣ س سباب ن دّات نّخ نّات ئسضعفن، ئيݣات ربّي ألّيݣ ديوزن ممّيس ݣ دّات ئتشباهن دّات-نّخ ئدنبن. خف لحساب ن دّنب ئحكم ربّي غيفس ݣ دّات.⁴ ئݣا أياد حما أد ئيشمّل لحكام نّا داي تتّر شّرع زّيݣنخ، نكني نّا دا ئتعيشن ؤر ئد خف لحساب ن دّات، والاينّي خف لحساب ن رّوح ن ربّي.⁵ ئتّخ وينّا ئتعيشن خف لحساب ن دّات دا تتّاوين ݣ ئسكّين ن دّات، والاينّي وينّا ئتعيشن خف لحساب ن رّوح ن ربّي، دا تتّاوين ݣ ئسكّين ن رّوح.⁶ د وينّا تيتّاوين ݣ ؤوينا ثرا دّات دا تّمتاتن، واليني وينّا تيتّاوين ݣ ؤوينا يرا رّوح ن ربّي دا تّيديرن يلي غورسن لهنا.⁷ ئتّخ ونّا داي تݣّان أينا ثرا دّات داي تضاضّا ربّي، ؤرداي ئضاع شّرع نّس، ولا ئقادّا أد ئس ئݣ.⁸ د ميدّن تعيشنين خف لحساب ن دّات، ؤر تّيغيين أد ݣين أينّا ئسرضون ربّي.⁹ ئد كنّي، هاثين ؤر دا تعيشم خف لحساب ن دّات، والاينّي خف لحساب ن رّوح مش ئلّا رّوح ن ربّي ئزديغ ديݣون. مشان مش ئلّا شان يون ؤر ديكس رّوح ن لمسيح، هان ونّا ؤر ئݣي وين لمسيح.¹⁰ مش ئلّا ديݣون لمسيح، هان دّات نّون تدا أت مّت زݣ لجيهث ن دّنب. والاينّي رّوح نّون ئدّر ئتّخ ربّي ئحاسبكن تصلحم غورس.¹¹ مش ئلّا رّوح ن ربّي نّا ديسكّر عيسى لمسيح زݣ ئنݣر ئمتّين ئزدغ ديݣون، ئوا ربّي نّا ديسكّر عيسى لمسيح زݣ ئنݣر ئمتّين ئدّا أد ئحيو أود دّات نّون ئمّوتن س رّوح نّس ئزدغن ديݣون.¹² خف ؤياد أيايتما، ؤر-اخ ئخصّا أنضفور دّات نّخ، حما أنعيش خف لحساب ن شهوات نّس.¹³ ئتّخ مش تضفورم شّهوات ن دّات، تدّام أت تمتم، والاينّي مش ثنغام لفعايل ن دّات س رّوح ن ربّي تدّام أت تيديرم.¹⁴ ئد كول وينّا داي حرّي رّوح ن ربّي، نيتني أݣان أرّاو ن ربّي.¹⁵ ئتّخ كني ؤر ثوميزم روح نا كن ئترارانئسمغان ألثوغر لخوف، والاينّي ثومزم رّوح نّا س ثعايدم ثݣام أرّاو ن ربّي، نتّا أمي دا نقّار: «بابا، آباباتنخ».¹⁶ ئد روح-اد س-ئخف نّس دا ئتشهاد ئ رّوح نّخ ئس نݣا أرّاو ن ربّي.¹⁷ ألّيݣ نيا نكني أرّاو ن ربّي، نيا ئورّاثن، س لمعنا: ئورّاثن ݣ-ؤينّا س-ئقاول ربّي، أها نشّار لورث د لمسيح، داي مش نلّا نشّار أݣيدس ݣ لعداب نّس، أنشّار أݣيدس أود ݣ لعزّ نّس.¹⁸ نكين حقّاخ لعداب نّخ ݣ دّونيت-اد دغي ؤر ئسوي والو دات ن لعزّ نّايدّا ربّي أد ئسباين ديينخ.
© 2024 Bible Society of Morocco, used with permission