¹² دّات ن بنادم غاس يون أيد ئݣا واخّا ديكس شايݣان ن لمفاصل. لمفاصل-اد مقّار ݣّوتن دا تݣين يون ن دّات، هاتين ئمشينّا أيد ئݣا دّات لمسيح.¹³ ئدّخ كول نخ نتوغبّزس يان رّوح حما أن نݣ يون ن دّات، نݣا ؤداين نغد وينّا ؤر ݣنين ؤداين، ئسمغان نغد ئحوريين. كول نخ نسوا زݣ يان ن رّوح.¹⁴ دّات ألتو ؤر ئݣي غاس يون لمفصل، ماشان ئݣا شايݣان ن لمفاصل.
¹⁵ مش ئنّا ؤضار: «نكّين ؤر ݣيخ أفوس، هاتين ؤر ݣيخ زݣ دّات!» ئوا ئس ؤر ئݣي ستيت زݣ دّات؟¹⁶ داي مش ئنّا ؤمژّوغ: «نكّين ؤر ݣيخ تيطّ، ئوا نكّين ؤر ݣيخ زݣ دّات!» ئس ؤر ئݣي ستيت زݣ دّات؟¹⁷ داي مش ئݣا دّات كول تيطّ، ئوا ما س مي ئدّا أد ئسغد؟ يي مش ئݣا دّات كول أمژّوغ، ئوا ما س ئدّا أد ئكضو؟¹⁸ والاينّي ربّي ئݣا لمفاصل كول ݣ دّات أم ؤينّا ئرا.¹⁹ مور ݣان لمفاصل كول غاس يان ن لمفصل، ماني دّات؟²⁰ هاتين مغار عدّان لمفاصل، مشان دّات ئݣا غاس يون.
²¹ خف ؤياد ؤر تّيغي تيطّ أد تيني يي ؤفوس: «ؤر كين حدادجخ!» نغد أد ييني ئخف يي ئضارن: «ؤر كون حدادجاخ!»²² ماشان لمفاصل ن دّات نّا تغالد ݣان ئمضعوفن، هاتين نيتني أمي ئخاتر وادّور.²³ د لمفاصل ن دّات نّا ؤر دا نتوقّار أمي دا نتݣا شايݣان ن شّان. ئد لمفاصل نّا ؤر ئليق أد غيفسن نسيول، نيتني أݣ مي دا نتهلّا شايݣان.²⁴ ئد لمفاصل نّا ضهرنين، هاتين ؤر حدادجان يي تّاهلّوياد. ماشان ربّي ئعديل دّات أها ئنهلّا ݣ لمفاصل نّا ؤر ئواتان والو.²⁵ حما، ؤر ئدّي أد ييلي بطّو ݣ دّات، أها دّان لمفاصل أد مياساين أنزݣوم.²⁶ مش ئلاّ شا ن لمفصل دا ئتهوّال، هاتين لمفاصل كول دا تهوّالن أݣّيدس، ماشان مش ئتواݣ لعزّ يي شا ن لمفصل، دا أݣّيدس فرحن لمفاصل ياضن.
²⁷ ئد كونّي تݣام دّات ن لمسيح أها ئݣ كويون زّيݣون لمفصل ن دّات-اد.²⁸ هان ربّي ئݣا ݣ-ؤݣراو ن-ئمومن: ݣ ؤمزوارو ئمازان، ويس سّين لانبييا، ويس شراط ئسلمادن، ضاراسن ميدّن نّا مي ئتمووش أد ݣين لموعجيزات، د وينّا ئجوجيين، د وينّا ئتعاوان، د وينّا ئتݣوّادن، د وينّا ئساوالن س والسيون ؤر ئتواسنن.²⁹ ئوا ئس ݣان كول نّسن ئمازان؟ ئس ݣان كول نّسن لانبييا؟ ئس ݣان كول نّسن ئسلمادن؟ ئس دا تݣين كول نّسن لموعجيزات؟³⁰ ئس أسن ئوشا روح ن ربّي كول نّسن توكّي ن-ؤجوجي؟ ئس دا ساوالن كول نّسن س والسيون ؤر ئتواسنن؟ ئس ݣان كول نّسن ئد ترجمان؟³¹ هاتين ئخصّاون أت ترزوم توكّيوين تيخاتارين، ماشان دغي دّيخ أد أون سنعتخ أبريد نّا ييفن وييّاض.
© 2024 Bible Society of Morocco, used with permission