³ أنبارش أيد ئݣا ربّي يبّاس ن ـ مولانا نّخ عيسى لماسيح، نّاخ ئوشان مايد ئݣان لباراكاث ن ـ رّوح نّس نّا لّانين ݣ ـ ئݣنوان ئدّخ نزدي د ـ لماسيح.⁴ أود لّيݣ ئسول ألّثو ؤر ئخليق دّونيث، ئسثيياخ س ـ لماسيح حما أنݣ وينس، ؤر ديݣنخ ئتّيلي أود يان لعيب منيداس. ݣ ـ ثايري نّس،⁵ يوفاثيد لحال ئزمّم زݣ ثيزويري أداخ ئيݣ د ـ أراو نّس س ـ سيدنا عيسى لماسيح، ئدّخ أياد أيد ئرا س ـ لخاضر نّس أد ئيݣ،⁶ حما أثنتّحماد خف رّحمث نّس ئݣان لعجب نّاخ ئݣا س ـ شايݣان ݣ ـ وودم ن ـ لماسيح نّا غورس ئعزّين.
⁷ نتّا أيد غيفنخ ئوشان دّيث س ـ ئدامّن نّس أها يغفراخ لمعصيّاث نّخ. س ـ ؤياد، ئسنعثاع ربّي رّحمث نّس ؤر ئلين لحدّ⁸ نّاس أخ ئغمس، ئسمونتّيد د ـ مايد ئݣان ثانژّي د ـ لفهم.⁹ ئسنعثاخ أينّا يعوّل أد ئيݣ نّا ؤر ئسنعيث ألثو ئي ياود يوكّ، ئمشينّا يرا س ـ لخاضر نّس أثيݣ س ـ لماسيح.¹⁰ حما أدّاي ثاوض لوقث نّا يزمّم، أد ئسمون أينّا يلّان كول ݣ ـ ئݣنوان د ـ واشال دّاو ن ـ ثنباطّ ن ـ لماسيح.
© 2024 Bible Society of Morocco, used with permission