⁹ دا ش تتّرخ غيفسن، ؤر دا تتّرخ خف ميدّن ن دّونيت-اد، ماشان خف وينّا ئ توشيد، ئدّخ ݣان وينّش،¹⁰ ونّا ئݣان وينو كول وينّش أيد ئݣا، د ونّا ئݣان وينّش هاتين وينو أيد ئݣا، لعزّ ئنو دا ئتبايان ديكسن.¹¹ علاحال، ؤر تغيماخ ݣ دّونييت، ئدّخ دّيخ أد-أغولخ غورش. والاينّي نيتني سولن ݣ دّونييت. أيبّا ئصفان، حضوتن س لجهد ن-ئسم نّش، لجهد نّا ئ توشيد، باش أد ݣين يون ئمشينّا ݣيخ أݣّيدش.¹² لّيݣ لّيخ أݣّيدسن، أر تن ؤحطّوخ س لجهد ن-ئسم نّش، لجهد نّا ئ توشيد. حضيختن ؤر زّيكسن يوشكي أود يون، غاس ونّا مي ئلازم أد ياشك حما أد-يجرو ؤينّا ئتّوارين ݣ لشتاب نّش.¹³ دغي، أيبّا ديخ أد-اغولخ غورش. داسن تّينيخ أوال-اد ماحد سولخ ݣ دّونيت، حما أد ديكسن ييلي ؤفراح ئنو، أفراح ئشمّلن.¹⁴ هاتين سّيوضخ-اسن أوال نّش، أها ؤر تن حميلّ ميدّن ن دّونيت، ئدّخ ؤر ݣين زݣ دّونيت، ئمشينّا ؤر ݣيخ نكّ زݣ دّونيت.¹⁵ ؤر دا زّيك تتّرخ أت تن تّاويد زݣ دّونيت، ماشان أت تن تحضود زݣ شّيطان.¹⁶ هاتين ؤر ݣين زݣ دّونيت، ئمشينّا ؤر ݣيخ نكّ زݣ دّونيت.¹⁷ ݣيتن د وينّش س لحقّ. هان أوال نّش ئݣا لحقّ.¹⁸ أكيس ئ توزنت غر دّونيت، أود نكّ دا تن تّازنخ غر دّونيت.¹⁹ د نكّين، ݣيخ ئخف ئنو د وينّش غيفسن، حما أد ݣين أود نيتني س-تيتّ وينّش.
²⁰ داي ؤر دا تتّرخ غاس خف ويد هيلّي، ماشان دا تتّرخ ألتو خف وينّا ئدّان أد ئسّي أمنّ س واوال نّسن.²¹ دا تترخ أد ݣين كول نّسن يون، أكيس ديݣي تلّيت أيبّا د نكّ لّيخ ديكّ، أد ݣين ألتو يون ديݣنخ، حما أد أمنّ ميدّن ن دّونيت ئد شݣّين أيد ئ يوزنّ.²² هان نكّ، ؤشيخاسن لعزّ نّا ئ توشيد، أكّ أد ݣين يون أكيس نݣا نوكّني يون.²³ نكّ، لّيخ ديكسن د شݣّين تلّيت ديݣي، باش أت تشمّل تامونت نسن أها ئسين ميدّن ن دّونيت ئد شݣّين أيد ئ د يوزن أها أر تن تيريد أكيس ئ تّيريد.²⁴ أيبّا، توشييتن، أها رّيخ أد ئلين أݣّيدي ماني ݣ دّيخ أد ئليخ، حما أد أنّاين لعزّ ئنو، لعزّ نّا يي توشيد، ئدّخ دا ئ تّيريد دات ن مايد تخلقد دّونيت.²⁵ أيبّا، شݣّين أيد-ئمنان. هان ميدّن ن دّونيت ؤر ش سّين، ماشان نكّينتين سّنخش، أها سنّ ئمحضرن ئنو ئد شݣّين أيد ئ د يوزن.²⁶ هاتين سنعتخاسن ماي تمسد أها سولخ أت تݣخ ألّو، حما تايري نّا ئ تّيريد أت تيلي ديكسن، أها ئليخ نكّ ديكسن».
© 2024 Bible Society of Morocco, used with permission