³⁶ «ئوا يخصّاياون أثاروا ن ـ إسرائيل كول نّون أتّيسينم ئيد سثيتّ سيدنا عيسى ياد نّا ثطّورقم خف ئحنيݣن أيد ئسثي ربّي ئيݣّيث د ـ مولانا د ـ لماسيح».
³⁷ نتّا سلّان ئي وياد نّاسن ئنّا بطرس، ئقّيم ديكسن لحال أها سقسانث نتّا د - ئمازانّ ضنين نّاناسن: «ماي نتݣّا أيايثماثنخ؟»³⁸ داي ينّاياسن بطرس: «ثوباث ئي ربّي، د - كّو يوكّ ديݣون أد ئتّوغبّز ݣ ـ وامان س - ييسم ن - سيدنا عيسى لماسيح حما أداون ئغفر ربّي لمعصياث نّون. داي يدّا أداون ئتّوش رّوح ن ـ ربّي.³⁹ ئدّخ أياد ئقّاولاونث ربّي كونّي د ـ ثاروا نّون، ئقّاولث أود ئي لݣنوس ضنين، ئي وينّا يسثي كول مولانا ربّي نّخ أد ݣين وينس».
⁴⁰ ئقّيم بطرس أراسن ئساوال شايݣان أرثن ئتّنهو أراسن ئتّيني: «فوكّوياث ئخفاون نّون زݣ لعيقاب نّا نّيقّان لجيل أد أنفراراغ!»⁴¹ كول وينّا يومنّين أوال ن ـ بطرس تّوغبّزن ݣ ـ وامان، داي ݣ ـ واسّ نّا ثزايد أمّ تلتالاف ن ـ يوكّ ݣ - ؤݣراو ن ـ ئمومنّ.
⁴² ئلين كويّاس أر سّغادن غر أينّا أراسن سّلمادن ئمازانّ، ݣين كول نسن أم واوماثن، أر تشّارن أغروم حما أد شثين سيدنا عيسى، أر تژالّان.⁴³ أها تّوݣينث شايݣان ن - لعجايب د - لموعجيزاث خف ئفاسّن ن - ئمازانّ، داي هبضن ميدّن كول.⁴⁴ أر تّمونن ئمومنّ كول نسن ݣين أمّ يوكّ، أر تشّارن أينّا غورسن ئلّان،⁴⁵ أر زنزان ئݣران نسن د ـ ؤينّا يݣان وينسن أر بطّون أثيݣ نس خف لحساب ن - ؤينّا يخصّان ئي كّو يوك ديكسن.⁴⁶ أر تمݣراون كويّاس ݣ - ثدّارث ن - ربّي س ـ يان رّاي، أر تشّورن أغروم ݣ - ثيدّار نسن، أر تتّين س - ؤفراح د ـ ثازدݣي ن - وول،⁴⁷ أر تمجّادن ربّي. داي رضون غيفسن ميدّن كول، أر ئتّزاياد مولانا كّوياس ݣ ـ ؤݣراو نسن وينّا يفوكّا.
© 2024 Bible Society of Morocco, used with permission