¹ دغي داسن تدمّامخ ئي ئخاثارن ن - ؤڭراو نّا لّانين أڭيدون، نكّين ئڭان أخاثار ن - ؤڭراو أم نثني ڭخ زڭ وينّا دا تبرّاحنين س - ئكرفيصن نّا ئكّان خف لماسيح، أها ئدّا أد غوري ييلي ؤمور ڭ - لعزّ نّا نّيقنن أدّ ييضهير،² أراسن تّينيخ: كساث ثاوالا ن - ربّي نّا خف ئكون ئڭا د - ئنبدادن، ؤر ئد س - دّرع مشان س - لخاضر (ئمشينّا يرا ربّي)، أها ؤر ئد خف طّمع مشان أتّيريم س - وولاون نّون أتّڭيم لخدمث ن - ربّي.³ د - أد ؤر ؤرزّوياث أتّباضم ڭ - وينّاس ئكون ئكلّف ربّي، مشان ڭاث وينّا تّثفار ثوالا.⁴ داي أدّاي دّياغول لماسيح ئڭان أخاثار ن - ئمكساون أتّامژم تّاج ن - لعزّ نّا ؤر دا ئتّرشون.
⁵ ئمشيسّ أود كونّي نّا مژّينين، تّضاعاث ثانباطّ ن - ئخاثارن ن - ؤڭراو، ثمضاعم ئنڭراثون كولّ نّون، د - أد ؤر تّيلي ڭراثون ثيخيثيرث ئدّخ ئتّواري ڭ - لشثاب ن - ربّي: " ربّي دا يتّنالا وينّاڭ ثلّا ثيخيثيرث ئد وينّا ڭ ـ ؤر ثلّي (وينّا دا سّمژينين س - ئخفاون نسن) داسن ياكّا رّضا"⁶ ئوا حودراث دّاو ن - ؤفوس ن - ربّي نّا غر ثلّا ثيغيتّ حما أد ئهزّا شّان نّون ڭ - لوقث نّا يزمّم،⁷ ثڭريم غيفس ئنزڭومن نّون س - ماس لّان ئدّخ نتّا دا تّيتّاوي ديڭون.⁸ ئلياث ڭ - ئخفاون نّون ثاويم بعيتّ، ئدّخ هان أنضليب نّون ئبليس دا يسّارا أر ئندّر أمّ ئزم ئرا مايد ئتتّا.⁹ ئوا نّالاتّ د - كونّي ثزڭّام ڭ - ليمان نّون، ثيسينم ئد ئكرفيصن أد نّا دا غيفون ئتّكّان دا تّكّان أود خف أيثماثون (د - ئسثماثون) ڭ - لماسيح نّا لّانين ڭ - مايد ئڭان أنسا ڭ - دّونيث .¹⁰ ربّي ن - مايد ئڭان رّحمث ئغراياون أتّامّوم ڭ - لعزّ نس ن - وابدا ئدّخ ثزديم د - سيدنا عيسى لماسيح. د - ضارث ن - مايد غيفون ئتّكّا ؤكرفص شان لوقث ئدروسن، ئدّا أكون ئڭ د - وينّا شمّلنين، ئسزڭّاكون، ئوشاون ثيغيتّ، أها ئسرصّاكون خف لّساس ئصحان.¹¹ أداس ثيلي ثنباطّ أبدا ن - ئبيدان. أمين.
© 2024 Bible Society of Morocco, used with permission