¹ يّيه، ستيتّ أيد-أون تّينيخ: «ونّا ؤر دا ئتّاكمن زݣ تݣّورت غر تحدجّورت ن وولّي، ماشان دا ئزرّي زݣ شا ؤدغار ياضن، هاتين أخوّان د أقطّاع أيد ئݣا.² ئد ونّا ئتّاكمن زݣ تݣّورت، نتّا أيد ئݣان أمكسا ن وولّي.³ أعسّاس ن تݣّورت دا س ئرژّم أها سلّينت وولّي ئ واوال نّس. دا ئقّار ئ وولّي نّس س-ئسماون نّسنت أها ياويتنت غر برّا.⁴ داي أدّاي ئسّوفغ ؤلّي نّا ݣانين تينّس، دا ئتدّو داتاسنت، أر ت تفارن ئدّخ سّننت أوال نّس.⁵ ئد أبرّاني ؤر دّين أت ت تفارنت، دا زّيكس رݣّلنت، ئدّخ ؤر دا تّيسينت أوال نّس».
⁶ ئقيساسن سيدنا عيسى لميتال-اد، ماشان نيتني ؤر فرين ما خف دا سن ئساول.⁷ داي ئنّاياسن سيدنا عيسى ديخ ألتو: «يّيه، ستيتّ أيدا أون تّينيخ: نكّين تاݣّورت ن تحدجّورت ن وولّي.⁸ كول وينّا د ديدّان داتي، ݣان ئشفّارن د-يقطّاعن، ماشان ؤلّي ؤر-اسن سّغيدن.⁹ نكّين تاݣّورت، ونّا ئتّاكمن زّيݣي أد ئفوكّا، أد ئكشّم، ئفّغ أها ياف ؤتشي نّس.¹⁰ أّشفّار ؤر دا دّيتدّو غاس أد ياكر، ئغرص أها ئخلو. ئد نكّ هاتين دّيخدّ أكّ أد غورسن تيلي تودرت أها ؤر-اسن ئتخصّا شا.¹¹ نكّين أمكسا ئژيلن، د-ومكسا ئژيلن دا ياكّا تودرت نّس خف وولّي نّس.¹² أخدّام، ؤر ئݣي أمكسا، د وولّي ؤر ݣينت تينّس. أدّاي يانّاي ؤشّن ئدّادّ، دا ئتّادجّا ؤلّي ئروول. داي ئحوّص ووشّن ؤلّي أها ئسلوزع تاوالا.¹³ أخدّام دا ئرݣّل، ئدّخ دا ئخدّم غاس خف تغراض، ؤر دا تّيتّاوي ݣ وولّي.¹⁴ ماشان نكّين أمكسا ئژيلن أيد ݣيخ، دا تّيسينخ ؤلّي نو د وولّي نو دا ئ تّيسيننت،¹⁵ ئمشينّا ئ ئسّن بّانو د نكّ دا تّيسينخ بّانو، دا ياكّاخ تودرت ئنو خف وولّي نو.¹⁶ أها غوري ؤلّي ياضن نّا ؤر ئݣين زݣ تحدجّورت-أد، ئخصّايي أت تن-يد أويخ ألتو. أد سّغدنت ئ واوال ئنو، أغولن أد ݣينت يوت ن توالا أها ييلي غورسن غاس يون ن-ومكسا.¹⁷ خف ؤياد دا ئ ئتّيري بّانو، ئدّخ دا ياكّاخ تودرت ئنو أكّ أت تّامژخ ألّو.¹⁸ ؤر ئكّي أود يون ئتّامژن رّوح ئنو، ماشان دا تّاكّاخ س لخاضر ئنو. تلّا غوري تنباطّ أد ؤشخ رّوح ئنو، أها تلّا غوري تنباطّ أت تامژخ ألتو، أياد أيد ئ ئنّا ئبّا أت تݣخ».
© 2024 Bible Society of Morocco, used with permission