¹ ئوا، أيايتماتنخ، هاتين تسّنم ئس ؤر غورون نددّي باطل.² أها تسّنم ألو ئس-اخ ݣان أيت تمدينت ن فيلبّي شايݣان ن لعار أها رݣمن-اخ. ماشان ربّي ئوشاخ لجهد حما أد-اون نسيول خف لينجيل، واخّا ݣان-اخ شايݣان ن ميدّن تّاعرّوض.³ ستيت، ألمّد نّخ ؤر ديكس أفرّوغ ؤلا طّمع ؤلا لغضر.⁴ والاينّي، ربّي ئجرباخ، يافن ئس ديݣنخ لامان، أياد أخف-اخ ئوشا أد نبرح س لينجيل نّس. أدّاي دا نتݣا أياد، ؤر-ئد حما أد نسّرضو ميدّن، ماشان حما أن نسّرضو ربّي نّا ئتّانّاين مايد ئلّان جاج ن وولاون نّخ.⁵ تسّنم ئس ؤر دجين نلحلح س واوال نّخ خف شا ن بنادم، د لموراض نّخ ؤر ئد أنسمون لفلوس، د ربّي ئݣا شّاهد.⁶ ؤر دجين نرزي أد-اخ ݣين ميدّن لعزّ، ؤلا أد-اخ تݣيم كونّي ؤلا أد-اخ تݣين ميدّن ياضن.⁷ مغار نݣا ئمازان ن لمسيح، ؤر غيفون نژيّر س تنباطّ نّا غورنخ ئلّان، والاينّي نݣا ئضرافيين أم ؤينّا تݣا تمطّوطّ ئسّوطوضن أراو نّس، لّيݣ نلّا أݣّيدون.⁸ س تاضفي نّخ، نرا أد-اون نوش ؤر ئد غاس لينجيل ن ربّي، ماشان نرا أد-اون نوش ألو أود تودرت نّخ، ئدّخ تاغولم تعزّيم شايݣان غورنخ.
⁹ أيايتماتنخ، ؤر تتّوم لخدمت نّخ د تمارا نّخ: نخدم س-ئض د واس حما ؤر نتݣ أݣّا ئژّاين خف أود يون زّيݣون أها أر-اون نسّاوال ألّو ݣ لوقت نّا خف لينجيل ن ربّي.¹⁰ كونّي، دا تشاهادم أها أر ئتشاهاد أود ربّي، ماكّا ݣّا صّرف نّخ أݣّيدون أئمومن، ئس ئصفا، ئݣ لحقّ أها ؤر ديكس لعيب.¹¹ أها تسّنم ألّو ئس أر-اون نتݣّا أم ؤينّا ئتّݣ ؤرݣاز يي واراو نّس.¹² أر كون نتوصّا، أر كون نسزعيم أها أر غيفون نتوكّاد أت تطفارم أبريد نّا ئسّمغوران س ربّي نّا أون ئقّار غر تݣلدييت نّس د لعزّ نّس.
© 2024 Bible Society of Morocco, used with permission