¹⁷ داي يازن بولوس غر ئخاثارّ ن ّـ ئمومنّ ݣ ـ أفاسوس أد غورس ددّون غر ميليتّوس.¹⁸ لّيݣ ديوضن غورس أها ينّاياسن: «هان كونّي ثسّنم أينّا ݣيخ كول ݣ ـ لوقث نّا كّيخ أݣّيدون زݣ واسّ أمزوارو نّاݣ ددّيخ غر ثمازيرث ن - أسيّا.¹⁹ لّيخ أر تݣّاخ لخدمث ن ـ مولانا س ـ ئمطّاون ؤر دجّين سخاثيرخ ئخف ئنو، أها سيكّين غيفي ووداين شايݣان ن ـ ثمارا س ـ ثخندالّاسين نسن.²⁰ ݣيخ ثامسّومانث، ؤر دجّين غيفون فّيرخ أينّا كون ئتّنفاعن كول، ماشان أراون تبرّاحخ ئيسّ س ـ طّايطاي برّا، أراونث سّلمادخ ݣ - ثادّروين نّون.²¹ أر تتّرخ زݣ ووداين د - ئيونانين أد ثوبن ئي ربّي أها يامنن س - سيدنا عيسى لماسيح.²² دغي هايي دّيخ أد ضاعخ رّوح ن ـ ربّي أها دّوخ غر لقدس مغار ؤر سّينخ ماي نّيقنن أدي يجرو دينّ.²³ ݣ ـ ثمدينين كول نّا أر تكّاخ، أر ئي يعلّم رّوح ن - ربّي ئيس ئي نيقّن أد تّييمژخ ݣ ـ لحبس، ثكّ غيفي شايݣان ن ـ ثمارا.²⁴ ماشان ؤر غوري ثواثا ثودرث ئنو شا، مايد ئي يهمّان نكّين غاس أد ݣخ أينّا غيفي يلّان، أها ݣخ لخدمث نّا يي يوشا سيدنا عيسى أتّݣخ: أد دّوخ أد ئنيخ ئي ميدّن ئنغميسن ژيلنين خف رّحمث ن ـ ربّي ثاخاثارث».
²⁵ «مشثا أيد أر سّاراخ ئنݣراثون أراون ساوالخ خف ثݣلديتّ ن - ربّي، ماشان دغي سّنخ ئيس ؤسار يانّاي أود يوكّ ديݣون ؤدم ئنو زݣ ضارث ن ـ واسّا.²⁶ خف ؤياد، داون تّينيخ أسّا س ـ طّايطاي هاثين برّاخ زّيݣون مش ثفّغم أبريد ن ـ ربّي.²⁷ ئدّخ هاثين نّيخاون أينّا يرا ربّي كول، ؤر غيفون فّيرخ أود ئميقّ.²⁸ ئوا لعار نّون ئخفاون نّون، د ـ لعار نّون وينّا خف ئكون ئݣا رّوح ن ـ ربّي د ـ ئنبدادن. ݣاث أمّ ئمكساون، ثحضوم أݣراو ن - ئمومنّ نّا خف ئوشا ربّي ئدامّن ن ـ ممّيس حما أثن ئفوكّا.²⁹ هاثين سّنخ ئيد أدّاي دّوخ، دّان ييتس ن ـ ميدّن ݣانين أمّ ووشّان نّاݣ ؤر ثلّي رّحمث أد كشّمن ئنݣراثون أها خلون أݣراو ن ـ ئمومنّ.³⁰ دّان أود ييتّس زّيݣون كونّي أد سّفراغن لحقّ حما أد سّخضون ئمومنّ أثن ثفارن.³¹ ئوا لعار نّون ئخفاون نّون، ثشثيم ئيد شراض ن ـ ئسݣّاسن س ـ ييض د - واسّ أيد أر كون توصّاخ، روخ غيفون س ـ ئمطّاون».
³² «دغي أيايتما، ؤدجّيخكون ݣ - ؤفوس ن - ربّي أكون ئحضو. د - واوال نس نّا دا يسنعاثن رّحمث نس ثاخاثارث ئدّا أكون ئسعاون أتّمغورم ݣ ـ ليمان، ئوشاون لبركاث نّا يقّاول ئي ميدّن نّا يسثي أد ݣين وينس.³³ ؤر دجّين عشيقخ نّقّرث ن ـ أود يوكّ ؤلا يورغ نس ؤلا ييعبانّ نس.³⁴ كونّي س ـ ئخفاون نّون ثسّنم ئيد ئفاسّن أد ئنو أس أر خدّمخ حما أدّ رارخ أينّايي يخصّان نكّ د ـ ئسمونّ ئنو.³⁵ ݣ ـ ؤينّا أر تݣّخ كول، سنعثخاون ئيس أخ ئخصّا أنخدم أها نوّث ثامارا حما أنسعاون وينّا ؤرغينين ئي شا. أد ؤر تتّوياث ئواليون ن - سيدنا عيسى لّيݣ ئنّا: "أياعريتّ ن ـ ونّا دا ياكّان ؤݣار ن ـ وونّا دا يتّامژن"».
³⁶ نتّا يشمّل بولوس أوال نس، ؤثن خف ئفادّن كول نسن، أها يژّالّ.³⁷ أر تّرون كول نسن، ݣريناس ئغيل ئي بولوس أرث سّودومن.³⁸ أها يقّيم ديكسن لحال عنوݣّا، لومعنّا لّيݣ أسن ئنّا: «ؤسار ثانّايم ؤدم ئنو زݣ ضارث ن ـ واسّا». داي مونن أݣّيدس ألّ أغرّابو مصافاضن أݣيدس.
© 2024 Bible Society of Morocco, used with permission