⁵ زريخك ݣ تݣزيرت ن كريت، حما أت تشمّلد لخدمت نّا نبدا أها تعيّند ئرݣزن ن غا ئݣين ئخاتارن ن-ئݣراون ن-ئمومن ݣ مايد ئݣان تامدينت أم ؤينّا ش وصّاخ.⁶ أخاتار ن-ؤݣراو ن-ئمومن، ئخصّا ؤر غيفس ئتّيلي أود يان ؤلامّا، يووْل غاس يوت ن تمطّوطّ، د واراو نّس دا تّامن س لمسيح أها ؤر تّينين ميدّن غيفسن دا فسّدن ؤلا ؤر دا توقّارن أود يون.⁷ ئدّخ أنمغور ن-ؤݣراو ن-ئمومن أيد ئكلّفن س-ئسكّين ن ربّي، خف ؤياد، ئخصّا ؤر غيفس ئتّيلي أود يان ؤلامّا، ؤلا ديكس لكيبر، ؤر دا س-ئتطيّار فيمرّا، ؤر دا ئسّا شّراب أر ئدوّخ، ؤلا أد ئݣ بويمنغان أها ؤر دا يورزّو رّبح ن لحرام أبدا.⁸ ئخصّاس أد ئترحاب س-ئنبياون، أر ئتّيري أينّا ئژيلن، أد ئݣ ؤرژين، ئمنا، ئصفا، ييلي نبض يي ئخف نّس.⁹ ئخصّا أد يامژ ݣ واوال ن لحقّ ئمشينّا س ئتّوسقرا، ئمشيد أد ييغي أد ئسزعم ميدّن س-ؤسقرا نّا ئصحان أها ئقژّر س لبيّينا وينّا ت-ئتضاضّان.
© 2024 Bible Society of Morocco, used with permission