¹⁹ «أد ؤر دجمعاث ئ-يخفاون نّون لخزين ن لكنوز خف واشال، ماني ݣ داتتّا تّونيا د تصضّا، د مانيݣ غيفس قّازن ئخوّان أتّاشر.²⁰ ماشان ݣات ئ-ئخفاون-نّون لكنز ݣ ئݣنّا ماني ݣ ؤر داث ئتتّا تّونيا نغد تصضا د ماني ݣ ؤر غيفس قازن ئخوّانن أتاشرن.²¹ ئدّخ ماني ݣ-ئلّا لكنز نّش دينّا أݣ ئتّيلي أود ؤول نّش».
(لوقا 11:34-36)
²² «ألّن أيد ئݣان أسيد ن صّاحت. داي مش صحانث والّن نّش، تدّا صّاحث نّش كول أتعمّر س-ؤسيد.²³ ئد مش ؤر ژيلنث والّن، تدّا صّاحت نّش أتيلّس. ئوا مش ياغول ؤسيد نّا ئلّان ݣ صّاحت نّش ئݣا تالّست، مشحال أيد توعر تالّست نّا!»
(لوقا 12:22-31؛ 16:13)
²⁴ «ؤر ئتّيغيي أود يون أد ئݣ ئسمخ يي سين ن-ئد بابين ن شّي، ئدّخ ئدّا ؤر ئتّيحميل يون أها ييري وايض، نغد أد ئقّيم د يون ئسّمزي وايض، هاثين ؤر تّيغييم أتݣيم ئسمخان ن ربّي د لفلوس».
²⁵ «خف ؤياد داون تّينيخ: أد ؤر تّاسيات أنزݣوم يي تودرت نّون مايد تتّام د مايد تلسّام، نغد يي صّاحت نّون مايد تلسّا، ئس ؤر توف تودرت ؤوتّشي، د صّاحت توف ملسيوت؟²⁶ راعات ئجضاض ن-ئݣنّا هاثين ؤر دا زرّعن ؤلا دا مݣّرن ولا دا سمونّون ݣ ئعريشن، أر تن ئستشّا بّا تون ن-ئݣنّا، د كونّي ئس ؤر تن توفم شيݣان.²⁷ مان ديݣون أدّاي ئخمّم، ئد أد ييغيي أد ئزايد يوت ن-تاسعت ݣ لعمر نّس؟²⁸ مّاخ ألّيݣ دا تّاسيم أنزݣوم ن ملسيوث؟ راعاث ئيلدجيݣن ن-ئݣران ميمش داتݣّان أد مغورن: ؤر دا تلّمن ؤلا دا خدّمن.²⁹ ماشان أداون ئنيخ، هان أود سليمان ݣ لعزّ نّس كول ؤر ئلسي أم يون زّيكسن.³⁰ مش دا ئسّلسا ربّي ئمشيد توݣا ئلّان أسّاد ݣ ئݣر، تتّياݣر أسكّا ݣ ؤفرّان ن لعافيت، ميمش أود كوني ؤر كن ئسّلسا، أوينّا مي ئدروس ليمان؟³¹ أد ؤر تّاسيات أنزݣوم أد تينيم: "مايد نتّتا د مايد نسّا نغد مايد نلسّا؟"³² هان أياد داتّازلان غيفس أود وينّا ؤر ئسّين ربّي، هان بّا تون ئلّان ݣ ئݣنّا ئسّن ئس ثحدادجم يي ؤوياد كول.³³ ماشان رزوياث ݣ ثيزويري كشماث ݣ تݣلديت ن ربّي، تمنوم، د-ؤياد كول أداون تيزايد.³⁴ أد-ؤر تّاسياث لهمّ يي واسّ نّا ديدّان، ئدّخ أسّ نّا ديدّان ئدّا أد ياسي لهمّ نّس يي ئخف نّس، كّوياس ئلّا س ثمارا نّس».
© 2024 Bible Society of Morocco, used with permission