¹ داي ئحري رّوح ن ربّي سيدنا عيسى غر لخلا حما أت تيجرّب شيطان.² أها ياژوم ربعين ن واس د ربعين ن-ييض ألّيݣ تينغا لاژ.³ داي ئدّود غورس شيطان ئنّاياس: "مش تݣيت ممّيس ن ربّي، ئنياسن يي ئيسليون أد عايدن أد ݣين أغروم".
⁴ أها ئجاوبت سيدنا عيسى ئنّاياس: "هاثين ئتواري ݣ لشتاب ن ربّي: ؤر ئد غاس س-ؤغروم أس دايتيدير بنادم ماشان س كول مايد ئݣان أوال ن ربّي".⁵ داي ياويت شيطان غر تمدينث تامقدست ن لقدس، ئسبدّيت نّيݣ ن تمصريت ن لهيكل زعما تدّارث ن ربّي.
⁶ أها ئنّاياس: "مش تݣيد ممّيس ن ربّي، ݣر ئخف نّش غر ئزدار، ئدّخ ئتّواري ݣ لشتاب ن ربّي ئس ئدّا أد غيفش ئوصّا لمالايكات نّس أد سحاضرن ئفاسّن نّسن حما أد ؤر تّاوضن ئضارن نّش ئسلي".
⁷ داي ئنّاياس سيدنا عيسى: "ئتيارو ديخ ألتو، أد ؤر تجرّاب سيدي ربّي-نّش".⁸ أها ياويت شيطان ديخ ألتو غر يون ن عاري ئعلّان شيݣان، ئسنعثاس تيݣلّيدين ن تميزار ن دّونيت كول د لعزّ نّست.⁹ داي ئنّاياس: "أياد أداشت تشفخ كول، مش تتّوتيت خف ئفادّن تشجدتيي".
¹⁰ أها ئنّاياس سيدنا عيسى: "دّو زّيݣي أ شّيطان! ئدّخ ئتّواري ݣ لشتاب ن ربّي ؤر تشجاد غاس يي سيدي ربّي باب نّش د غاس نتّا أيد تّعبادت".
¹¹ داي ئدّو شيطان ئزريث، دّوند غورس لمالايكات أر غيفس تسخارن.
(مارقوس 1:14-15؛ لوقا 4:14-15)
© 2024 Bible Society of Morocco, used with permission