¹ ئوا مش ئد ئس دتّوسكّرم د ـ لماسيح، رزوياث س ـ وولاون نّون خف ؤينّا يݣان وين ييݣنّا ماني ݣ ـ ئقّيما لماسيح (ݣ ـ وانسا ن ـ لعزّ د ـ ثنباطّ] خف ؤفاسي ن ـ ربّي.
² ݣاث لعقل نّون غر أينّا يݣان وين ييݣنّا، ؤر ئيد غر أينّا يݣان وين دّونيث.³ ئدّخ كونّي ثݣام أمّي ثمّوثم، د ـ ثودرث نّون ثاماينوتّ ثنثل د ـ لماسيح ݣ ـ ربّي.⁴ أسّ ݣ ـ ديضهر لماسيح، ئݣان ثودرث نّون ثدّام أود كونّي أدّ ثيضهيريم أݣيدس ݣ ـ لعزّ نس.
⁵ ئوا نغاث أينّا ديݣون ئݣان كولّ وين دّونيث: أمّ لفساد، د ـ ؤينّا ؤر ئزدّيݣن، د ـ لعشق ن ـ ؤينّا يݣان لعيب، د ـ شّهواث نّا ؤر ئحلين، د ـ طمع ئݣان أمّ لعيبادا ن ـ لاصنام.⁶ ئدّخ هاثين ئسكّين أمّ ويد أس غا ديدّو ؤسخاض ن ـ ربّي.⁷ أود كونّي س ـ ئخفاون نّون ثكّام أر تّيديرم ئمشيد أياد ئزرين لّيݣ أر تّݣّام ئسكّين أمّ ويد.⁸ مشان دغي ئخصّاياون أتّكّسم زّيݣون أود ئسكّين أد كولّ: أسخاض د ـ ؤزعاف، د ـ ثوخّيث، د ـ ئزوارن، د ـ واوال ن ـ لعيب نّا دا ديتّفغن زݣ ئقما نّون.⁹ أد ؤر تمسحيلّيلاث ئنݣراثون، ئدّخ هاثين ثكّسم زّيݣون بنادم أقبور نّا ثكّام ثݣام د ـ ݣار لفعايل نس،¹⁰ أها ثنسيم يان بنادم أماينو. ربّي نّا ثيخلقن دا يتّزاياد أث ئتّݣّا د ـ أماينو أرد ئي ثيرويس حما أد ييسين سثيتّ مايد ئمس ربّي.¹¹ س ـ ؤياد ؤر ئتّغيما بطّو ئنݣر ن ـ ووداي ؤلا ؤنّا ؤر ثيݣين، ئنݣر ن ـ ؤنّا يزݣنن د ـ ؤنّا ؤر ئزݣينن، ئنݣر ن ـ ؤنّا ؤر ئݣين ؤثمازيرث د ـ ؤنّا يݣان أهيماجي (أسيݣّيثي)، ئنݣر ن ـ ئسمغ د ـ ؤنّا ؤر ثيݣين؛ مشان ؤر ئلّي غاس لماسيح، نتّا أيد ئݣان مايد ئݣان شا ييلي ݣ ـ كّو يون (ݣ ـ وينّا ئسّ ؤمنّين كولّ).¹² كونّي يسثيكون ربّي أتّݣيم وينس أر كون ئتّيري، ئوا نساث ثاسا د ـ لحنينث، أد ؤر ديݣون تّيلي ثيخيثيرث، أها ييلي غورون لخاضر د ـ صّبر،¹³ أر تمساعافم ئنݣراثون. داي مش ئلّا ما خف ئتلامّا يوكّ وايّاض، ثساماحم ئنݣراثون، ئدّخ ئمشينّا أون ئسامح مولانا ئخصّاياون أود كونّي أتّمساماحم ئنݣراثون.¹⁴ د ـ نّيݣ ن ـ ؤياد كولّ نساث ثايري، هاثين ثايري ياد أكون ئزدين ݣ ـ يوث ن ـ ثامونتّ ئشمّلن.¹⁵ ثادّجيم لهنا ن ـ لماسيح أد ئباض ݣ ـ وولاون نّون، هاثين ئدّخ ثݣام أمّ يوكّ أخف أون ئغرا ربّي غر لهنا ياد. أها يخصّاياون أد تّحمادم ئي ربّي.¹⁶ أدّجاث أوال ن ـ لماسيح أد ئزدغ ݣ ـ وولاون نّون س ـ شيݣان ؤر غورس ئتّيلي لحدّ، د ـ س ـ مايد ئݣان ثانژّي تمّسّلماداث أر ثمنبّاهم ئنݣراثون، أر تهلّالم س ـ وولاون نّون س ـ ئيد زّابور د ـ تمديازين د ـ ثنشّادين ئمشينّا أون ئسنعث رّوح ن ـ ربّي، أر تحمادم ئي ربّي.¹⁷ د ـ ؤينّا دا تّينيم د ـ ؤينّا دا تݣّام كولّ أد ييلي س ـ ييسم ن ـ مولانا عيسى، أر ئسّ تحمادم ئي ربّي يبّاثنخ.
© 2024 Bible Society of Morocco, used with permission