²¹ يان واس ئيقرّبد بُطْرُس غر يَسُوع ئنّياس: «أمولانا، مشثا ن تيكّال أݣ ئتّدناب ݣما ݣ لحق ئينو أراس تساماحخ؟ ئد آر سبعا ن تيكّال؟»²² داي ئنّاياس سيدنا عيسى: «ؤر-اش تينيخ سبعا ن تيكّال، ماشان آر سبعين ن تيكّلت سبعا ن تيكّال.²³ خف ؤياد ثݣا ثݣلديت ن-ئݣنوان أم ؤݣلّيد ئران أد-ئمحاساب د-ئسمغان نّس.²⁴ ألّيݣ ئبدا أر ئس ئتمحاساب، أويناسد يون خف ئلّا ؤمرواس ن عشرا لاف ن-ؤقاريض ن نقرث.²⁵ ماشان ؤر غورس ئلّي ماسي ئتخلّاص أمرواس، داي يامر باب نّس أد تزّنزن نتّا د تمطّوط نّس د واراو نّس د وينّا غورس ئلاّن حما أد-ئفوكّا أمرواس نّس.²⁶ ئسجداس ئسمغ ئنّاياس: "صبر غيفي أ سيدي هايّي دّيخ أداش رارخ كول أمرواس نش!"²⁷ ئحنّا غيفس باب نّس أها ئرژماس ئسامحاس ݣ-ؤمرواس.²⁸ داي ئفّغ ئسمغ نّا ياف يون ئسمغ زݣ ئمدّوكال نّس نّامي ئتفار أمرواس ن ميّا دينار، يامژث داي ئجيّفث، ئنّاياس: "برمي أينّا داش تفّورخ!"²⁹ داي يتّوتّي ئسمغ ئݣان أمدّاكل نّس داث ن-ئضار نّس ئحاولث ئنّاياس: "صبر غيفي غاداش رارخ أينّا ييث تفورث".³⁰ داي ؤر ئري ماشان ييويث ئݣرث ݣ لحبس أر د-ئيخلّص أمرواس نّس.³¹ ألّيݣ أنّاين ئسمغان ياضنين أينّا ئجران، ثطايراسن شيݣان، دّون نّناس يي باب نّسن أينّا ئجران.³² أها ئغراسد ݣ لوقث نّا باب نّس، ئنّياس: "أيا ئسمغاد ؤر ئحلين! ؤدجيغاش أمرواس نّا كول، ئدّخ ئيث حاولث.³³ ئس ؤر غيفش ئلازم أود شݣّين أد ترحمث ئسمغاد أمدّاكل نّش ئمشي نّاك رحمخ نكّين؟".
³⁴ داي ئقلق باب نّس ئيشت ئ-وينّا ثيتعدابن أرد ئخلّص أمرواس نّا غيفس ئلّان كول.³⁵ ئمشيد أون ئتّݣا بّانو ئلّان ݣ ئݣنوان، مش ؤر دا ئتسامح كّو يون ديݣون زݣ ؤل نّس يي ݣماس».
© 2024 Bible Society of Morocco, used with permission