¹¹ كونّي نّا ؤر ئݣين ؤداين زݣ لاصل، كّان ووداين مشثا أياد أر غيفون تّينين ثݣام "أيث وار أزݣّن"، أر تعنّان س ـ ئخفاون نسن أر تّينين ݣان "أيث ؤزݣن"، مغار دا يتّوݣا وزݣّن غاس س ـ ؤفوس ݣ ـ صّاحث ن ـ بنادم. ئوا شثيياث¹² ئيس ثكّام لوقث نّا ؤر ثسّينم لماسيح، ؤر ثݣيم زݣ أيث إسرائيل أها ؤر ثامّوم ݣ ـ ؤينّاسن ئقّاول ربّي ݣ ـ ثاضيوين نّا يميوݣّا أݣيدسن، ثكّام أر تّيديرم ݣ ـ دّونيث ؤر غورون ئلّي رّجا ؤلا ثسّنم ربّي.¹³ ماشان دغي ݣ ـ ثݣام وين سيدنا عيسى لماسيح، كونّي نّا يكّان مشثا أياد ثبعدماس ئي ربّي ثاغولم ثقرّبماس س ـ لموث ن ـ لماسيح خف ئحنيݣن ن ـ ؤطّورق.¹⁴ ئدّخ نتّا أيد ئݣان لهنا ينݣراخ نوكني ؤداين د ـ كونّي نّا ؤر ثن ئݣين، أها يسمساسا ينݣراخ ئݣاخ د ـ يوكّ، ئكّس أݣادير ن ـ لعداوث نّاخ ئبضان. س ـ لموث نّس،¹⁵ ئكّس لوصييّاث د ـ ثنباضين ن ـ شّرع ن ـ ووداين حما أد ئسمون ؤداين د ـ وينّا ؤر ثن ݣينين أد ݣين يان لݣنس ؤجديد ئݣان وينس، ييلي لهنا ينݣراتسن.¹⁶ ئسمّعدالثن د ـ ربّي، ئݣّيثن د ـ يوكّ أها يكّس لعداوث نّا يلّان ئنݣراتسن س ـ لموث نّس خف ئحنيݣن ن ـ ؤطّورق.¹⁷ هاثين ئدّاد ئبرّحاون س ـ ئنغميسن ژيلنين خف لهنا كونّي نّا ؤر ݣينين ؤداين نّا يكّان ثبعدماس ئي ربّي، ئبّرحاخ أود نوكني ؤداين نّا يكّان نقرّباس.¹⁸ هاثين س ـ لماسيح أس نغي كول نّخ أنتّوحي غر ربّي يبّاثنخ س ـ رّوح نّس ئݣان يوكّ.
¹⁹ خف ؤياد، كونّي نّا ؤر ݣينين ؤداين ؤر ياد ثقّيميم ثݣام أمّ ئبرّانين نغد أمّ ئغريبن؛ ماشان ثاغولم ثݣام يوكّ د ـ ميدّن ن ـ ربّي أمّي ثݣام زݣ يوث ن ـ ثمازيرث، أها ثݣيم زݣ أيث ؤخام ن ـ ربّي.²⁰ كونّي ثݣام أمّ شان ثادّارث، ئمازانّ د ـ لانبيا أيد ݣان لّساس نّس، ئيݣ سيدنا عيسى لماسيح س ـ ئخف نّس أژرو ن ـ ثغمرث نّس.²¹ نتّا أس دا يتّمزداي لبني س ـ ماس ئلّا أها أر ئتّالي حما أد ئيݣ يوث ثادّارث ئزدّيݣن ئتّوسثين ئي مولانا.²² ئدّخ ثزديم د ـ لماسيح، ثامّوم أود كونّي ݣ ـ لبني ياد حما أتّݣيم كول نّون يوث ن ـ ثدّارث نّاݣ ئزدّغ ربّي س ـ رّوح نّس.
© 2024 Bible Society of Morocco, used with permission