¹ أيايتما، مش ئݣا زيݣون شان يون دّنوب، ئواجب غيفون كني نّا غر ئلاّ رّوح لقدس أت ترارم غر أبريد س لخاضر ئغّودان. تحضوم ئخفاون نّون، حما ؤر تن تݣّيم أود كني.² معاوانات أساي ن تقل ئنݣراون، ئمشيد أس تدّام أت تضاعم شّرع ن لمسيح.³ ونّا ئغالن ئس ئمقّور وادّور نّس د نتّا ستيت ؤر ئواتا والو، هاتين دا ئتغشّا ئخف نّس.⁴ والاينّي ئخصّا يي كويون أد-ئحقّا أينّا ئتݣا، مش ئژيل ؤينّا ئتݣا، تاسّاعت نّا غورس لحقّ أد-ئفرح أها ؤر ئسمساسا أينّا ئتݣّا د-ؤينّا تݣّان ميدن ضنين.⁵ ئتّخ كويون ئدّا أد ياسي أݣّا نّس.
⁶ ونّا ئتعلّامن أوال ن ربّي، ئلازم غيفس أد-ئشف زݣ لخير نّس يي ونا ت-ئتعلامن.
⁷ أد ؤر تغشّاث ئخفاون نّون، ربّي ؤر دا ئتادجا ئ ماي غيفس ئتقبّاضن. أينّا دا ئزرّع بنادم أݣ مݣّر.⁸ ئتّخ ونّا دا ئزرعن أينّا ترا دّات نّس، دا ئمݣّر زݣ دّات أهلاك، ئد ونّا دا ئزرعن أينّا ئرا رّوح لقدس، دا ئمݣّر زݣ رّوح لقدس تودرت ن دوام.⁹ خف ؤياد ئخصّا ؤر نتوحيل أد نزايد أد نݣ لخير، ئتّخ مش ؤر نبدي زݣ تيݣيت لخير، أدّاي تاوض لوقت ندّا أد نصيّف يوت ن لغلتّ ئژيلن.¹⁰ ئوا ماحدّ غورخ لوقت ئخصّا أد نݣ لخير يي ميدّن كول لومنّا أيتماتنخ ئمومن.
© 2024 Bible Society of Morocco, used with permission