¹ داي ݣ ـ ووسّان نّا لّيݣ عدّان ئمومنّ شايݣان، كّرن ووداين ئبرّانين أر تشثوان خف ؤداين أيت تمازيرث ئدّخ ؤر أر تّاكّان ئي نّامي مّوثن ئرݣزن زّكسن أمور نسنث زݣ لموعاوناث ن - كويّاس.² داي غريندّ ئمازانّ س - ثناعش ئي وݣراو ن ـ ئمومنّ كول أها نّاناسن: «هاثين ؤراخ ئعديل نوكني أنزري أبرّح س ـ واوال ن ـ ربّي، نقّيم أر نبطّو لموعاواناث.³ ئوا سثياث أيايثما سبعا ن - ئرݣزن زّيݣون، ئتّواسّنن ئيس ݣان لمعقول أها عمّرن س - رّوح ن - ربّي ثيلي غورسن ثانژّي، داي نݣيثن أد قّابلن ئسكّين أد.⁴ ئيد نوكّني ندّا أنحضو تژالّيت د ـ ؤبرّح س ـ واوال ن ـ ربّي».⁵ داي يعجباسن رّاي ن ـ ئمازانّ كول نسن، أها سثين ستيفانوس ئݣان أرݣاز غر ئلّا ليمان أخاثار ئعمّرن س - رّوح ن - ربّي، سثين فيليبّوس، د ـ بوروخورس، د ـ نيكانور، د ـ تيمون، د ـ بارميناس، د - نيقولاوس ئݣان زݣ أنطاكيّا، نّا يثفارن دّين ن ـ ووداين مشثا أياد ياغول فّير ن ـ ؤينّا أر ئتّامن س ـ سيدنا عيسى.⁶ داي أويند ئمومنّ سبعا ياد نّا سثين غر داث ن - ئمازانّ، سيرسن غيفسن ئمازانّ ئفاسّن نسن أها ژّالّين زݣ ثنيلا نس.⁷ داي أر ئتساقّا واوال ن - ربّي ݣ ـ مايد ئݣان أنسا، أر تعدّون ئمومن شايݣان ݣ - لقدس، أمنن أود شايݣان ن ـ ئنبدادن ن ـ ثدّارث ن ـ ربّي.
© 2024 Bible Society of Morocco, used with permission