²³ غاس رژمن أيث لمݣليس ئي بطرس د - يوحنّا، أغولن غر ئسمونّ نسن أها قّيسناسن أينّاسن نّان ئنمغورّ ن ـ ثدّارث ن ـ ربّي د - ئخاثارّ ن - ووداين.²⁴ نتّا سلّان ئمومنّ كول ئي وينّا، كّرن أر تژالّان كول نسن أر تّينين: «أسيدي ربّي، أونّا يخلقن ئݣنّا د - واشال د - لبحر ؤلا ماي ديكسن ئلّان.²⁵ شݣّ أيداس ئسنعثن مشثا أياد س ـ رّوح نش ئي يبّاثنخ سيدنا داود أمازان نش أد ييني: "مّاخ ألّيݣ هيجن لݣنوس، أر ݣّارن ميدّن لحساباث نّا ؤر ئنفيعن شا؟²⁶ حبّلن ئݣلّيدن ن - دّونيث ئي يمنغي، أها مساسان ئنبّاضن خف مولانا د - لماسيح نّا يسثي".²⁷ أياد س ـ ئخف نس أيد ئجران ݣ - ثمدينث أد، لّيݣ ئمّݣراو ؤݣلّيد هيرودوس، د - ؤنبّاض بيلاطس لبونطي، د - ئبرّانين، د - ميدّن ن - إسرائيل حما أد ݣين ثامودّوت ئي سيدنا عيسى، أمزيلّز نش أزدّاي نّا ثݣيد د - لماسيح نّا ثسثيد.²⁸ أها ݣين أينّا ثزمّمد ياد س - ثنباطّ نش د - لخاضر نش أد ئجرو.²⁹ ئوا راعا أربّي دغي، هاثين دا تتݣالّان ديݣنخ. نوكّني نݣا يمزيلّزن نش، سعاوناخ أنيغي أنبرّح س ـ واوال نش س ـ طّايطّاي.³⁰ سوݣّزد ثوجيث زݣ غورش، ثݣد لموعجيزاث د - لعجايب حما أتسّمغورد ئسم ن - ؤمزيلّز نش أزدّاي سيدنا عيسى».³¹ نتّا ژّولّان، ئرݣيݣي وانسا نّاݣ مّݣراون، داي تّوعمّرن كول نسن س - رّوح ن ـ ربّي، قّيمين أر تبرّاحن س ـ واوال ن - ربّي س ـ طّايطاي.
© 2024 Bible Society of Morocco, used with permission