¹ هاتين ئيوضيي ؤنغميس ن لفساد نّا ئلّان غورون، لفساد-اد ؤر تّيغين أت تݣين أود وينّا تعبادنين لاصنام، هان يون ؤرݣاز زّيݣون دا ئݣّان د تمطّوطّ ن-ئبّاس.² مغار ئسول ديݣون لكيبر! هاتين ئخصّا أد-اون ئطيّر أر تژعم ونّا ئݣان أزنّير-اد!³ ئد نكّين، ؤر لّيخ أݣّيدون س-ئخف ئنو، ماشان لّيخ أݣّيدون س لعقل ئنو، هاتين حكمخ ياد خف باب ن ؤزنّير-اد أمّي لّيخ أݣّيدون.⁴ أدّاي تمونم س-ئسم ن مولانا عيسى، لجهد نّس د لعقل ئنو لاّن أݣّيدون،⁵ يون ؤرݣاز أم واد ئخصّا أت توشيم يي شّيطان أد ئخلو دّات نّس، أها تفوكّا رّوح نّس أسّ ݣ-ئدّا أد ياغول مولانا عيسى.
⁶ هاتين ؤر ئژيل أت تݣيم لفيش! ئس ؤر تسّينم أوال نّا ئتّينين: «ئميق ن تمتّونت دا ئسّمتونا أركتي كول؟»⁷ ئوا، كسات زّيݣون تانّونت تاقديمت، حما أت تݣيم أم ؤركتي ؤجديد. كنّي تݣام أغروم وار تانّونت. ئدّخ ئلّا غورنخ ؤعلّوش ن لعيد ن لفصح نّا ئتّوغرصن غيفنخ. لمسيح، نتّا س-ئخف نّس أيد ئݣان أعلّوش-اد.⁸ خف ؤياد ئخصّا أنعيّد س-لعيد ن لفصح، ؤر ئد س تانّونت تاقديمت ؤلا س تانّونت ن تيخّوت د لفساد، والاينّي س-ؤغروم وار تانّونت، أغروم ن تازدݣي د لحقّ.
⁹ ؤريخ-اون ݣ تبرات ئنو: أد ؤر تمصرافات د-ئنفسادن.¹⁰ نكّين ؤر دا سّاوالخ خف ئنفسادن ݣ دّونييت-اد، د-ئضمّاعن، د-ئقطّاعن، د وينّا ئتعبادن لاصنام، هاتين مش ئݣا لحال ئمشيد ئخصّاون أت تفغم زݣ دّونييت-اد.¹¹ دغي، أينّا ريخ أد-اون ئنيخ، مش ئلاّ شا ن يون دا ئتيني ئݣا زݣ أيتماتنخ نّا ئتّامن س عيسى لمسيح، ئݣا أنفساد، نغد أضمّاع، نغد دا ئتعباد لاصنام، أر ئرݣّم ميدّن، أر ئسا شّراب أر ئدوخ نغد أر ئتّاشر. ئوا أد ؤر تمصرافات د ميدّن نّا ئݣان أم واد ؤلا تتشام أݣّيدسن.¹² ئوا مايد ئلّان ئنݣري د ميدّن نّا ؤر دا ئتّامن حما أد غيفسن حكمخ؟ ئس ؤر ئخصّا أت تحكمم خف ميدّن نّا ئلّان ݣ-ؤݣراو ن-ئمومن؟¹³ لاحقّاش، وينّا ؤر ݣين ئمومن، ربّي أيد ئدّان أت تن ئحاسب. هان لكتاب ن ربّي دا ئتّيني: «زّعات زّيݣون ݣار بنادم».
© 2024 Bible Society of Morocco, used with permission