¹⁸ ئدّخ أوال خف لموت ن لمسيح خف ئحناݣ ن-ؤطورق ئݣا تيحيطّ غر وينّا ئفغن أبريد ن ربّي، ماشان غورنخ نكني نّا ئفوكّان، ئݣا لجهد ن ربّي.¹⁹ ئدّخ ئتواري ݣ لشتاب ن ربّي: «أد خلوخ لحكما ن وينّا ئنژن، أها كّسخ تاعقّولت ن-ئعقّوليين».²⁰ ئوا، ماني ؤنژيژ؟ ماني لمعلم ن شّرع؟ ماني بولعقل ن زّمان-اد؟ ئسباين ربّي ئد لحكما ن دّونييت-اد تݣا تيحيطّ!²¹ ئدّخ ميدّن ن دّونييت، س لحكما نسن ؤر تّيغين أد ئسينن لحكما ن ربّي، خف ؤياد ئرا ربي أد ئفوكّا ئمومن س ؤبرّح ن لينجيل نّا ئݣان غر ميدّن تيحيطّ.²² ؤداين دا تتّرن لموعجيزا، د وينّا ؤر ݣينين ؤداين دا ؤرزّون لحكما.²³ ئد نكني دا نتبرّاح س لمسيح نّا ئتّوصلبن، أياد ئݣا لعترت ئ ؤداين أها ئݣ تيحيطّ غرلݣنوس ؤرݣينين ؤداين.²⁴ ماشان وينّا ئختار ربّي ݣان ؤداين نغد لݣنوس ؤرݣينين ؤداين، هان لمسيح ئݣا لجهد ن ربّي أها ئݣ ألتو لحكما نّس.²⁵ ستيت أينّا ئݣان تيحيطّ غر ربّي، يوݣر لحكما ن ميدّن. د-ؤينّا ئݣان ضّعف غر ربّي، يوݣر لجهد ن ميدّن!
²⁶ سموقلات أيايتما، ميمشي تݣام لّيݣ أون ئغرا ربّي؟ ؤر ديݣون شايݣان ن ميدّن نّا فهمنين، ؤلا ديݣون شايݣان ن ميدّن مي ئخاتر وادّور، ؤلا شايݣان ن شّرفا.²⁷ والاينّي ربّي ئخطار ئحياض ن دّونييت حما أد ئسحشم ؤنژيژن. أها ئخطار ئمضعوفن ن دّونييت حما أد ئسحشم وينّا جهدنين.²⁸ ربّي ئخطار وينّا غر ؤر ئلّي شّان، ئمحقورن، د وينّا ؤر ئواتان والو ݣ دّونييت حما أد ئخلو ئمعنݣرن.²⁹ ئمشيد، أود يون ن بنادم ؤر ئدّي أد ئفيّش خف ربّي.³⁰ والاينّي س ربّي نكني نݣا وين لمسيح نّا ياغولن ئݣا لحكما نّا د-ئتدّون زݣ ربّي، داي س لمسيح نݣا ميدّن نّا منانين، ميدّن ن ربّي أها ئفوكّاخ زݣ لمعصييات.³¹ ئوا، أم ؤينّا ئتّيني لكتاب ن ربّي: «ونّا ئران أد-ئفيّش، أد ئفيّش س-ؤينّا ئݣا مولانا».
© 2024 Bible Society of Morocco, used with permission