¹⁴ «ثݣلّيت ن-ئݣنوان دات ترويس يي يون ؤرݣاز ئران أد-ئسافر، ئغرد يي يسمغان نّس ئسبدثن خف ؤينّا ݣ لاّن غورس كول.¹⁵ ئشاس يي يون خمسا ن وارضل ن نقرث، ئد وايض ئشاس سين وارضل ن نقرث، ئد وايض ئشاس يون ن وارضل ن نقرث، كّو يون د-ؤينا مي ئغيي، فيساع ئدّو ئسافر.¹⁶ داي ئكر ونّا يومژن خمسا ن وارضل ن نقرث أر ئسّن ئسّاغ أر ئزّنزا ئربح ئرارد خمسا ن وارضل ياضن.¹⁷ د ئمشيد أيد ئݣا ونّا يومژن سين ن وارضل، ئرارد ألثو سين ن وارضل ياضن.¹⁸ ئد ونّا يومژن يون ن وارضل، ئدّا ئغزاس ݣ واشال ئنضل أرْضل نّا ن باب نّس.¹⁹ «ألّيݣ ديزري شيݣان ن لوقث ئعايد باب ن-ئسمغان نّا أد-ئمحاساب أݣيدسن.²⁰ داي ئدّود ونّا يومژن خمسا ن وارضل، ئنعثاس خمسا ن وارضلن ياضن، داي ئنّياس: "أسيدي، تشيثي خمسا ن وارضل، هاغاش خمسا ن وارضلن ياضن نّا ربحخ".²¹ أها ئنّاياس باب نّس: "ئغودا ؤيا ثݣيث، أييسمغ ئژيل ݣ ئلّا لامين! دغي ئلاّ ديك لامان خف ؤينّا ئدروسن، دّيخ أك وْكّلخ خف ؤينّا ئعدّان، كشمد أتفرحث د باب نّش".²² داي ئدّود ونّا يومژن سّين ن وارضل، ئنّياس: "أسيدي، تشيثي سين ن وارضل، هاغاش سين ن وارضل ياضن ربحخثن سّين".²³ داي ئنّاياس باب نّس: "ئغودا ؤيا تݣيد، أييسمغ ئژيل ݣ ئلّا لامين! دغي ألّيݣ ئلاّ ديك لامين دّيخ أك وكلخ خف ؤينّا ئعدّان، كجمد أتفرحث د بابنّش".²⁴ داي ئدّود غورس ونّا يومژن يون ن وارضل، ئنّياس: "أسيدي، سّنخ ئس ثݣيث يون ن-ؤرݣاز ئقسحن، دا تمݣّرث أينّا ؤر تزريعث أر د جماعث أينّا ؤر دزوزّرث.²⁵ داي ݣّدخ دّوخ خزنخ أرضل نّش ݣ واشال، دغي هياش أينّا ئݣان وينّش".²⁶ داي ئجاوبث باب نّس، ئنّياس: "أييسمغ ؤر ئژيل ݣ ئلّا لعݣز! تسّنث ئس دا مݣّرخ أينّا ؤر زريعخ أر د جماعخ أينّا ؤر زوزّرخ.²⁷ ئوا ئلازم غيفش أتسيرسث نّقّرث ئنو يي وينّا دا زنزانين أر سّاغن ݣ لفلوس، حما أدّاي د دّوخ أمژخ أينّا ئݣان وينو د ربح.²⁸ داي ئنّياسن يي يسمغان نّس: كسثاس أرضل، دزايدمث يي ونّا غر لّان عشرا ن وارضل.²⁹ ئدّخ كول ونّا غر ئلّا أداس ئتّوشف، ييلي غورس شيݣان، ئد ونّا غر ؤر ئلّي شا، أود أينّا غورس ئلّان أداس ئتياكّس.³⁰ ئد ئسمغ نّاݣ ؤر ئلّي نفع، ݣراث غر ثالّسث غر برّا، ديس أݣ تّيلين ئمطّاون د ؤغژاژ ن ثوغماس"».
© 2024 Bible Society of Morocco, used with permission