¹ رّوح ن ـ ربّي دا يتّيني أينّا يلّان: ݣ ـ ووسّان ئنݣورا، دّان ييتس أد فّغن ضارث ن ـ ليمان س ـ لماسيح، أوينتّ ݣ ـ لارواح دا يتّغوون د ـ ݣ ـ ئسّلميدن ن ـ شّاياطين.² أدّجين ئخفاون نسن أثن غرّان أيث سين ن ـ وودماون نّا دا سحيلّيلنين، نّامي مّوثن ييمان أمي ثن قّدن س ـ ووزّال،³ نّا ؤر ؤدّجينين ميدّن أد تّاولن، أها أر ثن تّنهارن زݣ ييتس ن ـ ووتّشيثن. مشان ربّي ئخلق ؤتّشيثن أد أثن تتّان وينّا ؤمنّين نّا سّنّين لحقّ أها أر غيفسن تّحمادن ربّي.⁴ ئدّخ أينّا يخلق ربي كولّ ئژيل، ؤر نتّيني ئهي خف أود ئميقّ، مشان أثنامژ نحمد غيفس ربّي،⁵ ئدّخ دا يتّزديݣ س ـ واوال نس د ـ ثژالّيت.
⁶ مش ثودّجيد أيثماش د ـ ئسثماش ئمومنّ أد رارين ثاغضفث ئي وياد، أتّݣد أمزيلّز ئژيلن ئي سيدنا عيسى لماسيح، د ـ شݣين ثݣميد خف واوال ن ـ ليمان د ـ ؤلمّود ئژيلن نّا تّفارد.⁷ ئد لقيساث ثيحياض ن ـ ثمغارين ؤر ئمساسان د ـ ليمان حيداسنث، ثدرّبد ئخف نش أتّيديرد يوث ن ـ ثودرث نّا خف ئرضا ربّي،⁸ ئدّخ رّياضا ن ـ صّاحث نّفع نس ئدروس، ئد مش دا تّيديرد ثودرث نّا خف ئرضا ربّي ديكس نّفع ئي مايد ئݣان شا. هاثين ئقّاول ئسّ ربّي ثودرث ن ـ دغي د ـ ثنّا غا ديدّون.⁹ أوال أد ئݣا لحقّ أها يخصّا أثيقبل كّو يوكّ.¹⁰ هاثين دا نخدّم أر نكّاث ثامارا ئدّخ نݣا رّجا نّخ ݣ ـ ربّي نّا يدّرن ئݣان أمفوكّو ن ـ ميدّن كولّ، لومعنّا وينّا ييسّ ؤمنّين.
¹¹ وصّا س ـ ئسكّين أها ثسلمدتّن.¹² أد ؤر تّادجا أود يوك أش ئحقّر ئدّخ ثمژّيد، ݣ ـ أرݣاز نّا تّثفارن ئمومنّ: ݣ ـ واوال، د ـ لفعايل، د ـ ثايري، د ـ ليمان د ـ ثودرث ئزدّيݣن.¹³ سيا غر نتدّوخ أد ؤر بطّو د ـ ثغري ن ـ واوال ن ـ ربّي ئي ؤݣراو ن ـ ئمومنّ أر ثن تنبّاهد، أر ثن تسّلمادّ.¹⁴ أد ؤر تفرّاض ݣ ـ ثوكّي نّا غورش ئلّان، نّاش ئتّوشان لّيݣ غيفش سيولن ئمومنّ س ـ ؤينّاسن ئسنعث ربّي، أها سرسن غيفش ئخاثارّ ن ـ ؤݣراو ئفاسّن نسن (أداش دعون س ـ لباراكا).¹⁵ أويتّ ݣ ـ ؤياد نّاش نّيخ، ثݣد ديكس ئخف نش، حما أد أنّاين كولّ نسن ئس دا تّزايادّ غر داث.¹⁶ رار لبال ئي ئخف نش د ـ ئي وسّلمد نّش أها ثسدامد أياد، ئدّخ مش ثݣيد أياد ثدّيد أتّفوكّود ئخف نش ثفوكّاد وينّا دا غورش سّغادنين أود نثني.
© 2024 Bible Society of Morocco, used with permission