¹⁶ لّيݣ أر ئتّعايان بولوس سيلا د ـ تيموثاوس ݣ - أثينا، يانّاي لاصنام ݣ ـ مايد ئݣان أنسا ݣ ـ ثمدينث داي يطيّراس شايݣان.¹⁷ ئكّر ئدّو غر ثمزݣيدا، ئقّيم أر ئتّمساوال د ـ ووداين د - ئيونانين نّا أر تّعبادنين ربّي، أر ئتّمساوال أود د ـ ميدّن نّا أر ئتّافا كويّاس ݣ - رّحبث ن ـ ثمدينث.¹⁸ يوث ن ـ ثيلمرث، أر ئتّمرارا أوال د ـ ييتّس ݣانين زݣ ثربيعث ن - لفالاسيفا نّامي دا تّينين ئبيقّورين د - ئرواقين، مشد ييتس نّان غيفس: «مايدا ئتّيني بو وديدا ياد؟» ئيد ييتس ضنين نّان: «عينخ واد دا يساوال خف شان ئيد ربّي نّا ؤر نسّين». ئدّخ أر ئساوال خف سيدنا عيسى د - ثنشرا زݣ لموث.¹⁹ داي ياوينث غر لمݣليس ن ـ ثمدينث نّامي دا تّينين أريوباغ أها نّاناس: «نرا أنيسين ماتّا وسّلمد أد ؤجديد نّا خف دا ثساوالد؟²⁰ ئدّخ هاثين نسلّاياش دا تّينيد ييتس ن - ئسكين ݣانين لعجب، نرا أنيسين ماي ثن ئݣان».²¹ يافد لحال أيث أثينا س ـ ماس لّان د - ئبرّانين نّا زدغنين ديكس دا زّروين لوقث نسن س ـ ؤماثا ݣ ـ ؤسّغاد غر ئسكّين ݣانين ؤجديدن نغد دا غيفسن سوالن.
²² داي يبدّ بولوس ݣ - وامّاس ن - لمݣليس أها ينّاياسن: «أ يايث أثينا، ئضهري ديݣون ئيس ثحضام دّين زݣ مايد ئݣان ثاسݣا.²³ ئدّخ لّيݣ أر سّاراخ ݣ - ثمدينث نّون، أر تّراعاخ ئسكّينّ نّا دا تّعبادم، ؤفيخ يان وانسا نّاݣ دا تعبادم ئتّواري غيفس: "وين ربّي نّا ؤر ئسّين أود يوكّ" ئوا هاثين ربّي ياد نّا أر تّعبادم أها ؤر تّسّينم، نتّا أخف داون ساوالخ.²⁴ ربّي ياد أيد ئخلقن دّونيث د - مايد ديكس ئلّان كول، نتّا أيد ئݣان باب ن - ييݣنّا د - واشال، ؤر دا يزدّغ ݣ - ثيدّار نّاس ئعديل بنادم س - ؤفوس نس.²⁵ ؤر ئقّيل غر ميدّن أداس ݣين أود ئميق ئدّخ نتّا س ـ ئخف نس أي دا ياكّان ئي ميدّن س ـ ماس لّان ثودرث د - وونفوس د - مايد ئݣان شا.²⁶ ئخلق لݣنوس ن ـ دّونيث كول زݣ يان ؤرݣاز، ئݣيثن خف وودم ن - واشال أديكس زدغن، أها يسرصّا زݣ ثيزويري مشثا أغا كّين ݣ ـ ثودرث نسن د ـ لحدود ن ـ ثميزار نسن.²⁷ ئݣاسن ربّي أمشيسّ حما أد غيفس رزون بار أثمّانّين أها يافينث، مغار ؤر ئبعيد نتّا خف أود يوك ديݣنخ.²⁸ ئدّخ نتّا أس دا نتّيدير، أر نتحرّاش أها نيلي ݣ ـ دّونيث. ئمشينّا نّان ييتس زݣ ئمديازن نّون: "نوكّني ثاروا نس أي نݣا"».
²⁹ «ئوا لّيݣ نݣا ثاروا ن - ربّي، ؤراخ ئخصّا أنيغال ئيس ئݣا ربّي أمّ شان لاصنام ن ـ وورغ نغد وين نّقّرث نغد وين ؤژرو نّا يعديل بنادم س ـ ؤفوس نس أمشيسّ أسث ئسنعث لعقل نس.³⁰ هاثين ربّي ئسّورفاسن ئي ميدّن أياد نّا يزرين ئدّخ ؤر سّينن ئسكّين أد؛ ماشان دغي، دا يتّيني ئي ميدّن كول ݣ - مايد ئݣان أدغار أد عايدن غر أبريد نس.³¹ ئدّخ ئݣا ربّي يان واسّ نّاݣ غا يحاسب ميدّن ن ـ دّونيث س - لحقّ خف ؤفوس ن - يان ؤرݣاز نّا يسثي. أها يوشاسن ئي ميدّن كول ثماثارث ن ـ ئيس ثيسثي لّيݣ ثيد ئسكّر زݣ لموث».
³² نتّا سلّين وينّا حاضرنين ئي بولوس ئسيول خف شان يوكّ يكّرد زݣ لموث، قّيمين ييتّس ديكسن أر غيفس تصّان، ئيد ييتّس ضنين نّاناس: «نرا أداخ ثسيولد ؤݣار خف ؤياد لمرث ضنين».³³ داي يفّغ بولوس زݣ لمݣليس نسن.³⁴ ماشان ييتّس زّيكسن ݣان زݣ ثمناطّ ن ـ بولوس أها أمنن س ـ سيدنا عيسى. ئلّا ديكسن ؤنّامي دا تّينين ديونيسيوس ئݣان يوكّ زݣ أيث لمݣليس ن ـ أريوباغ، د ـ يوث ن - ثمطّوط ئسم نس داماريس، د ـ وييّاض ضنين.
© 2024 Bible Society of Morocco, used with permission