² فرحات شيݣان، أيايتما مش تلاّم ݣ شيݣان ن تمارا.³ تسينم ئس دا د - يتّاوي ؤجرّب ن ليمان نّون صّبر.⁴ ماشان أدجّات صّبر أد ئݣ ديݣون لخدمث نّس ئشمّلن، حما أت تشمّلم، تيليم ؤر تناقّصم ݣ أود يون ن-ؤسكين.⁵ داي مش ئلّا ونّا مي تخصّا لحكما، أت تيتّر يي ربّي نّا دا ياكّان يي ميدّن س بلا لحساب أها ؤر دا يتلامّا.⁶ ماشان ئلازم أد ئتّر س ليمان، ؤر ئتّݣا شّك. ئدّخ ونّا ݣ ئلّا شّكّ دا د-يتّاوي يي يوث ن ثمزازث ن لبحر نّا دا يتّاسي ؤژوُو أها أر ت-ئݣّار.⁷ ؤر ئتضونّا بنادم نّا ئس ئدّا أد يامژ شا زݣ مولانا.⁸ ئد أرݣاز غر لّان سين ئيبردان، ؤسار ئثبيث.
⁹ أد ئفرح ݣماثون أمژلوض، ئتخ ئيهزّا ربّي شّان نّس.¹⁰ ئد ونّا ئطرّحن أد ئفرح، ئتخ ئسّن ئس ثيݣا ربّي د يون ئيتواضعن أها ئسّن ئس ئݣا أم يون ؤلدجّيݣ ن ثوݣا ؤر ئتدامن.¹¹ ئتخ أدّاي دا تنقّار ثافوشث س لحما، تسغر ثوݣا، ئتّوتّي ؤلدجّيݣ نّس، ئمّث، ئدّو زّين ن-ؤراعا نّس. س-ئيمشيد أس ئتّالوُو ونّا ئطرّحن ألثو ݣ شغالات نّس.
¹² أياعريت يي ؤرݣاز ئتصبارن ݣ لمحاين، ئدّخ أدّاي ئسّيك أجرّب دا ئتّامژ تّاج ن تودرت نّا ئقاول مولانا يي وينّا ثيتّيرين.¹³ ؤر ئتّيني أود يون أدّاي ييلي ݣ ؤجرب س-ؤينّا ؤر ئحلين: «هان أجرّب-اد ئدّاد زݣ ربّي!» ئتخ ربّي ؤر دا ئتوجرّاب س-ؤينّا ؤر-ئحلين، د ؤر دا ئتجرّاب أود يون س-ؤينّا ؤر-ئحلين.¹⁴ ݣ لحق، كّو بنادم دا ئتّوغرّا أدّاي ئدفور شهوات نّس.¹⁵ أدّاي دا ثّارو شهوث دا ثّارو دّنوب، ئد دّنوب أدّاي مغورن، دا تّاوين غر لموث.
¹⁶ أيايتما ئعزّان، أد ؤر تّادجات أود يوت لحاجت أكون تسّوفغ زݣ ؤبريد.¹⁷ كو ثوكي ئژيلن د كو لهديث ئشملن ثݣزد زݣ وافلّا، تضرد زݣ غور ربّي، باب ن-ئثران نّا ؤر دا ئتبدّالن، ؤلا ئضور ئݣ أمالو.¹⁸ س لموراض نّس، ياروياخ س واوال ن لحق حما أد نݣ لغلت ثامنزوت سنّيث، يي كو مايد ئخلق.
© 2024 Bible Society of Morocco, used with permission