¹⁶ هاتين مش دا تبرّحخ س لينجيل ؤر غوري ماس غيفون تفيّاشخ، ئدّخ ئݣا لفرض. أويها نو مش ؤر دا تبرّاحخ ئس.¹⁷ مش دا تݣّاخ لخدمت-اد س لخاضر ئنو أد-امژخ غيفس تيغراض، ماشان مش ؤر دا ت تݣّاخ س لخاضر ئنو، ئوا هاتين دا تݣّاخ لخدمت نّا يي يومّر ربّي.¹⁸ مايد ئݣان تيغراض ئنو؟ تيغراض ئنو أت تبرّاحخ س لينجيل فابور، أها ؤر تتّرخ أود يان لحقّ نّا يي ئوشا لينجيل خف لخدمت ئنو.
¹⁹ نكّين ؤر دا ديݣي ئتنباض أود يون أها ؤر ݣيخ ئسمغ غر أود يان. والاينّي ݣيخ ئخف ئنو د-ئسمغ غر ميدّن كول حما أد داويخ شايݣان ن ميدّن يي لمسيح.²⁰ عايدخ غر ؤداين أم شا ؤداي، حما أد داويخ ؤداين يي لمسيح. مغار ؤر لّيخ دّاو ن تنباطّ ن شّرع، عايدخ غر ميدّن نّا ئلّان دّاو ن تنباطّ ن شّرع ن موسى أمّي لّيخ دّاو ن تنباطّ ن شّرع، حما أد داويخ وينّا ئلّان دّاو ن تنباطّ ن شّرع يي لمسيح.²¹ أها عايدخ غر وينّا ؤر دا تݣين س شّرع أم شا ن يون ؤر دا ئتّݣ س شّرع، حما أت تن داويخ يي لمسيح، والايني ؤر تتّوخ شّرع ن ربّي، ئدّخ دا تضاعخ شّرع ن لمسيح.²² أغولخ غر وينّا مي ئدروس ليمان أم شا ن يون مي ئدروس ليمان، حما أت تن داويخ يي لمسيح. عايدخ مايد ئݣان شا غر ميدّن كول حما أد فوكّاخ ئتس زّيكسن.²³ هاتين دا تݣّاخ أياد كول، ݣ-ؤدم ن لينجيل، حما أد غوري ييلي ؤمور ݣ لباراكات نّس.
²⁴ ئس ؤر تسّينم، أدّاي دا تݣّان ميدّن حمزوار دا تّازلان كول نّسن، ماشان غاس يون أيدا ئتّاوين رّبح؟ ئوا أزلات حما أت تاويم رّبح.²⁵ وينّا تزلانين دا تّيلين نّبض ݣ-ئخف-اون نّسن ݣ مايد ئݣان شا حما أد أمژن يون ن رّبح نّا يوقطّون، ئد نكني دا نتّازلا حما أن نامژ يون ن رّبح نّا ؤر دا يوخلّون أبدا.²⁶ خف ؤياد، نك سّنخ ما خف تّازلاخ، أر كّاتخ ألّو س ؤحودّيز، ؤر ئد أم ونّا ئكّاتن ݣ-ؤزوو،²⁷ ماشان أر سكّاخ شايݣان ن تمارا خف دّات ئنو أها أر تين سضاعاخ، ئدّخ ݣدخ ؤر تّنجاحخ نكّين ئتبرّاحن يي ميدّن س لينجيل.
© 2024 Bible Society of Morocco, used with permission