¹ فّير ن - ؤينّا يسثي سيدنا عيسى ثناين ؤسبعين ن ـ ؤمحضر ضنين، أها يازنثن سينّ سينّ أث زويرن غر مايد ئݣان ثامدينث د - مايد ئݣان أدغار نّا غر ئعوّل أد ئدّو.² أها ينّاياسن: «ثامݣرا ثعدّا، ماشان دروسن ئشوّالن، ئوا تّراث ئي مولانا باب ن - ثمݣرا أدّ يازن ئشوّالن عدّانين غر ثمݣرا نّس.³ ئوا دّوياث، هايي ؤزنخكون أم ئعلّوشن ئنݣر ن - ووشّان.⁴ أد ؤر تّاسياث أݣيدون لفلوس، ؤلا ياخريض، ؤلا يبوركسن ئمشوياض؛ أد ؤر تسلاّماث خف أود يوكّ ݣ - ؤبريد.⁵ داي ثادّارث نّا غر ثكشمم، أها ثينيم ݣ - ثيزويري: "أزول خف أيث ثادّارث أد".⁶ داي مش ديكس ئلّا ونّا يران لهنا، ئدّا أد غيفس دّيݣّز لهنا نّون، ئيد مش ؤر ديكس ئلّي، ئدّا لهنا نّون أد غورون دّياغول.⁷ قّيماث ݣ - ثادّارث نّا غر ثكشمم أد ؤر زّيكس تّموتّياث، ثشّيم ثسويم أينّا غاون ؤشين، ئدّخ كول ؤنّا دا يخدّمن ئواثا ثيغراض نّس.⁸ داي مش ثدّام غر شان ثمدينث أها رحبناون ميدّن نّس، ثشّيم أينّا غاون ؤشين،⁹ ثجّوجيم ئموضينّ نّا ديكس لّانين أها ثينيم: "هان ثاݣلديتّ ن - ربّي ثقرّبد غورون".¹⁰ ئيد مش ثدّام غر شان ثمدينث أها ؤر كون رين ميدّن نّس، فّغاث غر ئساراݣن نّس أها ثينيم:¹¹ "هان أود أݣضرور ن ـ ثمدينث نّون نّا ينّضن ݣ ـ ئضارّ نّخ داونث نتنقّار، ماشان ئسيناث ئيس تثقرّب غورون ثݣلديتّ ن - ربّي".¹² أداون ئنيخ: هان لحالث ن - ثمدينث ن - سادوم ݣ - واسّ ن - لحساب ثدّا أتّاف لحالث ن - ثمدينث نّا».
(ماتّى 11:20-24)
© 2024 Bible Society of Morocco, used with permission